امبارح كان عمري عشرين

كنا واحنا صغار..نحب القمر أكتر..ونغني للعصافير..ونحن للبندر..

البوست ده اهداء لمرام..

حدث جليل حصلي السنة دي..كنت اتكلمت عنه قبل كده..ألا وهو بلوغي سن العشرين..

“ياه عشرين ده إنت لسة طفل يابني..ده انا لو كنت بلعب بديلي زمان كان زماني خلفت واحد قدك..بكرة تتخرج وتتجوز وتدوق العذاب"

"إيه ده إنت بقيت عشرين..على كده أنا اقولك يا عمو"

بقالي عقدين عايش..ياه شوف الزمن..(العقد بكسر العين هو فترة من الزمن تعادل 10 سنين)..

أول مابفتكر الموضوع ده بييجي في دماغي حاجتين..

أول حاجة: شريط محمد منير:"امبارح كان عمري عشرين"..الشريط ده كان نازل سنة 2005 يعني ايامها كان عندي بظبط 15 سنة (لاحظ إن أنا مولود في بداية عقد ودي حاجة جامدة جدا عشان بتسهلي إني احسب عندي كام سنة لما بانسى)...ساعتها لما كنت باسمع الشريط وبالذات الأغنية دي بأقول..ياه أكيد محمد منير ده كبير عشان يقول امبارح كان عمري عشرين..

دلوقتي بعد ماكبرت وبقيت 20+ أقدر أقول..: "امبارح ..كان عمري عشرين"

تاني حاجة بتيجي فيدماغي: أيام زماان..لما كنت 10-12 سنة كده..كنت ببص للناس اللي هم 20 سنة فما فوق..على انهم اعجاز تاريخي..على إنهم عباقرة لم ينجب الزمان منهم الكثير...وكنت بشوف سن العشرين ده بعيد قوي..وإني لما هوصل السن ده هكون حققت ¾ احلامي..واللي سعيد على ده كمان..كان زمان يعدوا يقولولك عارف مش عارف مين اختراع مش عارف إيه وهو عنده كام سنة..والكلام اللي ملوش لازمة ده..

طب ليه واحنا صغيرين كنا بنتمنى إن احنا نكبر؟ ولما كبرنا نفسنا نرجع صغيرين تاني؟

أنا نفسي أرجع صغير تاني..أيام مكنش في مسئوليات..مفيش ضغط من الدنيا كلها عليك..مفيش وجع دماغ..في لعب وبنبوني ومصاصات وعيديات وكارتون ومنتزه وبامبرز(وسعت مني دي (

أيام البتاع الغريب ده اللي كنا بناكله..اللي مش عارف كان عبارة عن إيه..بس كان بيبقى أكل مضروب في الخلاط..((gerber?

أيام تصرفاتنا الطفولية التلقائية..

أيام ماكنا ننزل مع الوالد نصلي الجمعة...ونزنق نفسنا معاه في نفس الصف عشان منبعدش..

أيام ماكنا نتنقل من سرير لسرير عشان نقعد عالحتة الساقعة اللي لسة محدش استخدمها..

أيام ماكنا مابنغسلش اطباقنا ( وبركز عالحتة دي عشان بعاني منها)

أيام ماكنت أصعب مسألة عندنا: 2+2-4/10

أيام ماكنا بنضحك فعلا على توم وجيري..

أيامfifa98 وسوبر ماريو..

طيب هو احنا لازم تفكرنا يبقى سلبي كده؟لازم يبقى نفسنا نرجع للطفولة لدرجة إن احنا منفكرش في المستقبل؟ لازم نفكر إن احنا محققناش حاجة من اللي كنا بنحلم نحققها؟

الموضوع ده حيختلف من شخصية للتانية..ممكن يكون حافز..وممكن يكون مثبط..

بس أهم حاجة إن احنا نعيش اللحظة..ونخطط لبكرة...

Abraham Lincoln:

And in the end, it's not the years in your life that count. It's the life in your years.

Tweet

Alexandria Engineering Model United Nations 2010

The Alexandria Engineering Model United Nations will be the first Model United Nations in Faculty of Engineering Alexandria University. It will simulate
- United Nations Framework Convention on Climate Change.
It will discuss the challenges that arises due to climate change and the unsettled issues after the COP 15.
Participants will be trained, by adequate trainers, on the critical thinking, communication skills, presentation skills, team work skills, negotiation skills, researching skills, means of diplomacy, action planning and means of knowledge transfer.

Elegibility criteria:
- Basic knowledge of English language
- Eagerness to learn
- Enrollment as a student of Faculty of Engineering Alexandria University
- Good general knowledge

To participate fill in the form below:
https://spreadsheets.google.com/viewform?formkey=dEFSeGFmeENLaUM0bFlaZDFYR1p5UGc6MA

Application deadline:
Saturday, 13th of March 2010

Facebook Group:
http://www.facebook.com/#!/group.php?gid=353447868551&ref=mf Tweet

كايرو

تاني رحلة للقاهرة في خلال اسبوعين..المرة دي كان فيها بيات..كنت رايح عشان احضر كايرو كود كامب...المهم قررت أبات عند خالتي اللي في الهرم وال GUC في مدينة نصر..يعني كده مسافة من هنا للساحل الشمالي.. وتخيل معايا بقى المشوار ده في زحمة القاهرة بنت ال***..يعني 3 ساعات يوميا..

المهم..زمان قالولنا إن بنت المعز القاهرة..حتى الصبح ساهرة...أنا موافق عالشطر التاني..الاولاني بقى ..فاكس..القاهرة بنت كلب ..بنت ***..بنت أي حاجة تانية...طيب..إيه المشاكل اللي واجهتني خلتني أقول كده؟

أولا:زحمة يا دنيا زحمة..زحمة ولا عادش رحمة..فعلا..عندما يجتمع الزحام مع الجو الحار مع غباء السائقين..إذًا فـأنت في القاهرة..

ثانيا: شعب واطي..أصل مشكلة القاهرة إن 50% من القاعدين فيها مش من سكانها..فـمش عارف يمكن إحساس بعدم الإنتماء فـبيبوظوا فيها...مش عارف..الراجل يبقى جنبه صندوق الزبالة..ويرمي علبة السجاير في الشارع..يعني مش مكفيه التلوث بتاع السجاير..

ثالثا: تلوث...خنقة..بلد خنقة..هوا قذر..

رابعا: النقل العام..النقل العام ده بقى قصة لوحده! هو من اللي أنا فهمته..إن في نوعين من النقل..في نوع تبع الحكومة وده بيبقى بـنص جنيه..وده السواقين جُمال ولطاف زي بتوعنا كده...النوع التاني..اللي هو شركة خاصة عملاه..ده بيبقى من جنيه لحد 2 جنيه..المهم السواقين بتوع النوع ده إيه بقى..ولاد تيت...أصل الفكرة إن في آخر اليوم..حسب ماالسواق جمع فلوس..بياخد bonus زيادة عالمرتب يعني..فـعشان كده بيسوق بغباء..وكمان بيبقى مضايق قوي لو في نفس الأتوبيس قبليه فـبيموت نفسه عشان يسبق وياخد الزباين...ولك ان تتخيل بيسبقوا إزاي بقى!

خامسا:اسماء الشوارع والأماكن وخلافه;في الزوو هناك ..فيه مكان اسمه..بيت حيوانات التجارب..مش عارف أول ماشفته ابتسمت ابتسامة ذات مغزى..تخيلته كده المكان اللي بيجمعوا فيه عينات من الشعب عشان يختبروا فيه القرارات والسياسات والحاجات دي..ويشوفوا رد الفعل قبل مايتحفونا..

وفيه كده شارع متفرع من شارع الهرم(أيوه بتاع الرقاصات) اسمه شارع الوحدة العربية..ولا تعليق..

فيه مستشاره قانونية اسمها زيادة سيدهم..اسم جميل..

فيه صيدلية اسمها صيدلية محمد عثمان..اتاري أنا عندي صيدلية ومش حاسس..

فيه بقى مبنى كده كبير قوي فشارع الهرم...معرفش مبنى إيه بس مكتوب عليه كده..الديموقراطية هي توكيد السيادة للشعب!!!!!! وسلملي عالشعب..

سادسا:السواقين العاديين بقى..من عامة الشعب..بيسوقوا سواقة زبالة..يعني كان في عسكري واقف عند إشارة..فـوقف الإشارة ووقف قدام العربيات.....قام واحد كده معديه وكسر الإشارة...وطبعا العسكري معوش دفتر ياخده مخالفة...

سابعا:الوحدة الوطنية متشفية هناك...كنت راكب فيأتوبيس..فـفي راجل كده وقع منه مفك في الشارع والأتوبيس ماشي ..فـالسواق بيقولوا..هو المفك عادة ولا صليبه..قاله صليبه...قاله طب مش حقف..عارف لو مكنش صليبه كنت وقفتلك...

ثامنا: الإختلاف الفظيع فمستوى المعيشة من مكان لمكان...تمشي فيرمسيس والجيزة والهرم وخلافه..تلاقي الشعب الغلبان الفقير..تروح مصر الجديدة أو القاهرة الجديدة..تلاقي ولاد الذوات اللي عندهم عربية وإتنين...

تاسعا:GUC أو الجامعة الألمانية في القاهرة..كرهت الدنيا بسببها..بقول لصحابي..دي حاجة كده اعلى من سيتي ستارز..موز موز موز..تحس إن هما مش رايحين يتعلموا..عملنلهم كافيهات..وملاعب..وخلافه..وكلهم ماشيين couplesيعني لو شفت ولد وبنت ماشيين يبقوا متصاحبين..لو شفت ولدين ماشيين سوا يبقوا لا مؤاخذة..لو شفت شاب كده امور ماشي لوحده..يبقى إيه ده بقى؟ أيوه بظبط اللي جه في دماغك يا سافل..

ملاحظة اخيره..واضح إن مشكلة قسم كمبيوتر أو هندسة عامةً.. مشكلة دولية محلية عالمية...هندسة بنين!!

Tweet