9 أيام

9 أيام على اتمامي العشرين

الماضي..شبح بيطاردك..ماضيك الأخلاقي العاطفي العلمي الأسري...

الماضي...الزمن الجميل ..ليه دايما كل ماالإنسان بيكبر بيحس إن زمان كان أحلى..

"فين أيام أما كان رغيف العيش مليان وب5 صاغ"

"فين أيام عبدالحليم وأم كلثوم"

ابائنا واجدادنا دايما يقولوا إن أيامهم كانت أحلى..أيام الطربوش..أيام أم كلثوم..أيام الشوارع الفاضية..

9 أيام على اتمامي العشرين

الماضي...ماضيك كان أحلى؟

تفتكر لو إنت رجعت بسنك الحالي 10 سنين ورا,هتحس إن هو أحسن برضه؟

زمان وأنا صغير..كنت بحلم باليوم ده...اليوم اللي بتم في رقم من مضاعفات ال10..10..20...30..40..50..

عمري ماحسيت إني وأنا بقرب لليوم ده هابقى خايف..

9 أيام على اتمامي العشرين

احنا ليه بنحتفل بعيد ميلادنا؟ يمكن عشان الإحتفال ده يدينا أمل إن مستقبلنا هيبقى أحسن من ماضينا؟ ولا وصلت درجة تفاهة الإنسان إنه يحتفل بسنة نقصت من عمره؟

فعلا أنا عمري مفهمت الناس اللي بتحتفل بالمجازر وذكرى مذبحة مش عارف إيه..

الإنسان مخلوق عجيب غريب...مرة شفت فيلم..كان بيحكي عن مخلوقات فضائية..والفيلم اكنهم هم الطبيعيين..وجالهم واحد من الارض..وإزاي هم شافوا غريب جدا عنهم...

أنا متأكد لو طلعنا بره الدايرة..وبصينا علينا..هنقول إيه اللي احنا بنعمله ده

9 أيام على اتمامي العشرين

عمري ماجتلي الفرصة إني اقعد مع نفسي.. اقعد في الكافيه..أو في النادي..آخد مشروبي.. اقعد أكلم نفسي..(بصوت مش مسموع طبعا)..احكيلها عن حياتي واللي حصل فيها..احكيلها عن احلامي...عن خيالاتي الجامحة..عن كمية البنات اللي أعجبت بيهم..عن البنتين اللي حبوني ومحبتهمش...عن البنت اللي حبيتها ومحبتنيش..عن احلامي في السفر لأي بلد حتى لو كانت كينيا...عن رغبتي في إني أدخل اقتصاد وعلوم سياسية...عن معاناتي في كليتي في قسمي..

عندي احساس غريب بعدم الإنتماء للكلية دي...يمكن عشان كان ليا منحة في GUC وعرفت متأخر؟يوميها اضايقت قوي...بس قلت أكيد فيها خير..بس يومها قررت إن مش فارقة..امتياز من جيد جدا من جيد من مقبول...كلها مسميات...

نفسي اشتغل في مجال الصحافة..أو الكتابة عامةً...مثلي الأعلى أحمد خالد توفيق..راجل عبقري...

احساس فظيع بالتبلد...تبلد في المشاعر..تبلد في الاحاسيس...مبسالش على حد..يترتب عليه ماحدش بيسأل عليا..عزلة..

آه يا زمن...

بشتاق لأيام الطفولة..بس ده موضوع تاني...

9 أيام على اتمامي العشرين

دايما بييجي فيدماغي سؤال...ليه كليتنا كده...ليه امتحاناتنا يوم و يوم..ليه بيطلعوا **** في الامتحانات...والعكس تماما في الكلية التانية...بين كل مدى ومدى 3 4 أيام..مابيرحوش الكلية أصلا..

ليه واحد بيلعب ماتش 90 دقيقة فالإسبوع وبياخد عليه 30 ألف جنيه..وواحد بيشتغل 8 ساعات في اليوم وبياخد في الشهر 800 جنيه

ليه ناس بتتولد تلاقي أهلها اغنيا وناس تتولد تلاقي أهلها فقرا..

قد إيه الدنيا ظالمة...

9 أيام على اتمامي العشرين

Tweet

Heaven,Hell

زمان كانت الدنيا فيها خير وشر..فيها صالح وفاسد...كنت تعرف تفرق بين الصح والغلط
كنت تلاقي الناس اللي بتعمله الغلط بعيد عن الناس اللي بتعمل الصح
خطين ماشيين بيودوا في طريقين مختلفين
كان في جنة وفي نار

دلوقتي..مع ال"عولمة"
ومع التقدم..
ومع شيوخ الفضائيات
وتلاقي قناه عملها واحد غني للقرآن والدعوة والطهر
تجري قناتين كده..تلاقيه عامل قناه تانية فيها هيفا ومروة وكلمني شكرا
الحال بتاعنا دلوقتي عامل زي الصورة اللي تحت دي بظبط

مجتمع اتملى نفاق
عشان كده عندنا رجال الشرطة ناس متدينة في بيتها باليل..ومطلعين **** الشعب الصبح
عندنا الاخوان المسلمين..وشفنا الإنتخبات كانت عملة إزاي
عندنا شيخ الازهر..تخصص تفصيل فتاوي

عندنا الشباب يقول إن شاء الله والحمدلله ويصوم رمضان...وتلاقي مع نفسه شخص تاني خالص

عندنا اللي حط رميكس هيفا أنا قادرة اعيش...مع القرآن الكريم كاملا مرتلا
عندنا كل حاجة
مصر أم الدنيا

Tweet

الرجالة اللي بتبص وراها

“الكرة بتطلع الراجل اللي جوانا"
هو لسة في رجالة ؟ الرجالة ماتوا في حرب 73
ياعم رجالة مين..كفاية إن تامر حسني هو نجم الجيل
--------------------------------------------------------------------------
معانا النهرده في الستوديو في برنامجكم حواء..الدكتور النفسي الشهير فرويد المصري..هنتكلم في موضوع مهم جدا..هو موضوع التحرش
إزيك يا دكتور...تمام يا قمر ..قصدي تمام
احنا عيزينك يا دكتور تكلمنا عن أسباب انتشار التحرش في مجتمعنا
بصي يا قطة...التحرش انتشر بسبب البنات أولا..تلاقي البنت من دول نزلة..ضاربة كيلو دقيق احمر على وشها...وضاربة أكسيجن بس تقيل شوية في شعرها..وضاربة بنطلون أختها الصغيرة اللي عندها 3 سنين..وضاربة الفنلة الداخلية بتاعت اخوها اللي عنده 3 سنين-توأم أختها التانية-.
حضرتك يعني شايف إن الرجالة مالهمش أي ذنب في الموضوع ده
ذنب إيه بس..ده كفاية إن الرجالة مستحملة اللي بيحصل فيهم..احنا نبص آه..غير كده لااا
طيب حضرتك ننقل ل نقطة تانية..زي محضرتك قلت..البص..الرجالة بقت عينيها زايغة قوي..مفيش بنت في الشارع بيسيبوها في حالها..تحس إن هم دكاترة تشريح..يبدأ من الشعر..ويخلصوا عند ضفر صباع الرجل الكبير
بصي حضرتك أنا اتفق معاكي في النقطة دي...احنا بقينا بلد الرجالة اللي بتبص وراها..(تعدي واحدة في الكواليس..يقوم الدوك باصص وراه(

--------------------------------

النهرده وأنا ماشي في الشارع اكتشفت حاجة عجيبة غريبة..اكتشاف عظيم..هضيفو لاكتشافاتي الأخرى العظيمة..بس المرة دي احتمال اعملها نظرية..نظرية:

الرجالة اللي بتبص وراها

مقدمة للنظرية لابد منها:

تعريف:الرجالة اللي بتبص وارها هي عبارة عن رجالة..بتبص وراها

السلوك:تعرف الرجالة اللي بتبص وراها..لما يكون راجل منهم ماشي في الشارع..في اتجاه معيَّن..وتيجي بنت في الاتجاه المعاكس...وتعديه..تلاقي كل الرجالة اللي في نفس اتجاههـا بيبصوا وراهم عالبنت..هما دول الرجالة اللي بيبصوا وراهم.

اماكن تكاثرهم:في الشوارع الزحمة..في المولات..في أي شارع في بنت معدية.

اهدافهم:ملهمش أهداف معينة..بيبصوا على أي بنت وكل بنت..بس ملاحظ إن هم بيحبوا الجانب الخلفي..يعني البنت لازم تبقى ماشي فياتجاه معاكس..

تطورهم:بدأ يظهر نوع جديد...لو البنت ماشية فنفس الإتجاه..بيبصوا وراهم برضه..وفي نوع تاني يقوم ماشي براحة لغاية ماالبنت تعدي...ويبص قدامه عادي..ده نوع مهجن(hybrid.)..ده مش منتشر قوي لانه بيبقى اذكى من التانيين

النظرية:

مصر بقت بلد الرجالة اللي بتبص وراها

شرح النظرية وامثلة:

امشي في أي شارع فيمصر..هتلاقي الرجالة ماشية بقفاها..بطريقة تتحدى جميع قوانين الطبيعة..بيبقى ماشي وهو باصص وراه....

مثال:النهرده وأنا ماشي نحية نفق سيدي جابر..واحدة محجبة معدية عكس اتجاهي في أمان الله..لقيتلك الراجل اللي قدامي لف وبص عليها...البنت أصلا لابسة محترم جدا..

بعديها بشوية..واحدة تانية عدت بس محجبة ولبسة بنطلون..لقيتلك راجل قدامي اام لافف باصص برضه...هو في إيه ..النهرده يوم اللف العالمي ولا إيه؟

بعديها بشوية لقيتلك بنت معدية..بنت بنت يعني...فأنا قلت في ذات نفسي إذا كان المحجبة بصولها دي هيعملوا فيها إيه..قمت وقفت على الخط اللي بيوصل بينها وبين الراجل اللي قدامي...الراجل بيتدور عشان يبوص..لقاني فوشه بابتسم الإبتسامة الشهيرة:"قفشتك يا ابن ال.."

أسباب انتشارها: أيوه كده يا وديع..أخيرا فهمتني

المراجع:قنوات مزيكا..ميلودي..شوموفيز..

أفلام من عينة حين ميسرة..قبلات مسروقة..احاسيس..الريس عمر حرب..كلمني شكرا

أي تعديل أو إضافة مرحب بيه.

Tweet

ياااااه

عمرك جربت يبقى نفسك في حاجة..لمدة طويلة قوي قوي...ومتعرفش توصلها..
وفجأة تلاقي طاقة القدر اتفتحتلك..وتلاقي الحاجة دي قدرت توصلها...
وتفضل الحاجة دي معاك..وتفضل معاك..وتفضل معاك..
لحد ماتخنقك...
لحد ماتشتاق لايام أما الحاجة دي مكنتش عندك؟
أيام أما مكنتش مهتم إنك تحافظ عالحاجه دي...لانها مكنتش عندك..
بس أما جاتلك..اهتميت إنك تحافظ عليها..لان إنت عارف إنها جاتلك ضربة حظ وممكن تروح في أي لحظة..
أيام لما كان بالك مستريح..وشاري دماغك..
هو اينعم كان دماغك فيها إن نفسك في الحاجة دي..بس مكنتش شاغل نفسك بيها طول الوقت..
عمرك حسيت الاحساس ده؟
أكيد حسيته
أنا كمان حسيته
احساس مش لطيف
لو في الة زمن
لو بس في
كان زماني رجعت بالزمن
أيام ماكان الزمن
غير الزمن
لما كنا أطفال
نعمل أشكال
بالصلصال!
أيام ماكان البال مستريح
والعقل مطمن
والقلب فاضي
وصحابك
واهلك
وناسك
يااااه
لو في الة زمن
لو بس في
!

Tweet

حصاد 2009

حسيت إني لازم أكتب البوست ده مش عارف ليه...مع نهاية سنة وبداية سنة جديدة قلت لازم أكتب حصاد ل أهم احداث السنة من وجهة نظري...

أولا: سياسيا

1--حراك سياسي كبير جدا حصل في مصر السنة دي..الناس بدأت تفهم يعني إيه انتخابات ويعني إيه حق شعب إنه يقرر مصيره...وكمان زادت الإعتصامات والاضربات..وموضوع الانتخابات كمان..الناس بدأت تتحرك بجد..
2--موجة كراهية عامة ل مصر بدأت بالدول العربية..أو مش بدأت هم كانوا كارهنا أصلا..وشكلها هتنتهي بدول العالم كله بعد اللي حصل للنشطاء الاجانب في القاهرة وموضوع قافلة شريان الحياة ..
3--سقوط القناع عن بعض نواب مجلس الشعب والشورى اللي هم في نفس الوقت رجال اعمال...وفضح الإرتباط الكبير بين السلطة وراس المال في مصر..
5--فوز مكرم محمد أحمد نقيب الصحفيين..والفساد اللي ظهر في الانتخابات..
6--طبعا احداث ماتش الجزاير والتوتر السياسي اللي حصل وفشل الخارجية المصرية في التعامل مع الازمة واللي أدى إن احنا اللي طلعنا الغلطانين قدام الرأي العام العالمي...
7--التوتر اللي حاصل بين مصر وقطر..واللي أدى إن الريس محضرش قمة الدوحة..
8--فشل الخارجية المصرية برئاسة أبوالغيط في كل قضية كانت بتمس مصر وسمعتها خارجيا..واهدارها ل حقوق المصريين بره مصر
9--زيادة عدد المحافظات فيمصر ..(وصلوا 29 باين؟)
10--مصر تعلن دخولها في المجال النووي السلمي

ثانيا:احداث اقتصادية

1--أكيد الحدث الاكبر اللي كان في مصر هي موضوع أوراسكوم تيليكوم وبيع حصة موبينيل فيها ل فرانس تيليكوم والدوشة اللي حصلت..
2--الازمة الإقتصادية العالمية اللي حصلت...وصدور تصريحات من عندنا إن مصر ماتاثرتش بيها خالص..
3--استعادة البورصة ل جزء كبير من عافيتها..بعد الانخفاض الشديد ف2008 ..
4--ارتفاع التضخم فمصر ل درجة إنه وصل فيشهر ل 22% وأرقام غريبة كده..
5--ازمة دبي وتأثيرها على مصر اللي لسة مظهرش لحد دلوقتي في رأيي بس هايظهر في الاستثمارات العقارية المستقبلية في مصر..
6--اعتصام موظفي الضرايب العقارية..واعتصام خبراء وزارة العدل ..
7--الضريبة العقارية..

ثالثا:حوادث وقضايا

-1-الحكم على هشام طلعت مصطفى ومحسن السكري بالاعدام فيقضية مقتل سوزان تميم..
2--الحكم على قتل هبة بنت ليلة غفران ونادينا..بالاعدام..
3--حادث قطر العياط..اللي حصل بسبب جاموسة..واستقالة وزير النقل
4--القبض على سفاح المعادي
5--انفلونزا الخنازير وقرار مصر اعدام الخنازير واشتداد انتشاره وزيادة عدد الوفيات..

-6-مقتل مروة الشربيني وتعاطف العالم مع المسلمين

رابعا:احداث ثقافية

1--خسارة فاروق حسني لمنصب اليونسكو
2--وفاة مصطفى محمود
3--وفاة ناصر الانصاري والطيب الصالح

خامسا:احداث رياضية

1--فشل مصر في التأهل ل كاس العالم..
2--فشل الأندية المصرية في الحصول على أي بطولة قارية
3--فشل منتخب الشباب فيكاس العالم اللي استضافته مصر على الرغم من صرف 20 مليون جنيه على المنتخب
4--فشل منتخب اليد شباب برده فيكاس العالم للشباب وحصوله على المركز الرابع
5--الهجوم على ابوتريكة ل أول مرة بعد مال القافلة تسير
6--الاهلي والزمالك يعينوا مدير فني محلي

أكيد طبعا أنا في حاجات ناقصة..بس دي الحاجات اللي قدرت ارتبها فيدماغي واكتبها
يارب تكون 2010 سنة أحسن من السنة اللي فاتت علينا جميعا

Tweet