Showing posts with label آراء. Show all posts
Showing posts with label آراء. Show all posts

Tuesday, May 4, 2010

عقوق

مع هوجة بس يا سيدي.. وقامت معيطة..ومع حلول ذكرى مهمة بكرة(4-5-2010)..ومع قعدتي مع السفيرة الأمريكية في قاعة واحدة امبارح..فكرت..أيوه فكرت-عارف إنها حاجة غريبة-..فـقلت..مصر..علمونا من زمان إن مصر أم الدنيا..ومش حأليش الالشة التيت ..طب مين ابوها..أنا هأليش الشة أزبل..طيب جبتهم ازااااااي؟ وبعد تفكير عميق..وبعد متفرجت على فيلم جنيفر لوبيز الجديد...اكتشفت إن هم أطفال انابيب..أيوه انابيب..ماما مصر..جابت بقية الدول..بالانابيب..وده يفسر العقوق اللي فيه الدول دي..

لأ وخيالي شطح أكتر وأكتر..قعدت اتخيل بيت مصر عامل إزاي..أكيد زحمة..أكيد بيبقوا وقفين طابور عالحمام..أكيد فيه أطفال من كل الاعمار..وأكيد كلهم رجالة ماعدى مصر..

مشهد 1 : مصر قعدة مع إسرائيل و"السلطة الفلسطينية":

بس يا واد إنت وهو..وجعتوا قلبي..إلهي ياخدوا ويخلصني منكم..

ماما..فلسطين بتضربني جامد يا ماما..

كذاب أنا ضربتك ضربة خفيفة..إنت بتضرب أكتر من الضربة..

يا جماعة لازم تلتزمو بضبط النفس..مش كل شوية كده وجعتو دماغي..واد يا فلسطين..أنا هقفل عليا الاوضة بباب فولاذي أنا وإسرائيل ومش هدخلك خالص عندنا..

مشهد 2 : مصر قعدة مع امريكا

مصر بصوت واطي: إزيك يا ابني..قولي البس إيه النهرده

البسي الفستان الاخضر عالشنطة الحمرا

حاضر..تاكلو إيه النهرده؟

ناكل محشي وجمبري وفراخ ومانجة وكيك

حاضر يا ابني..عايز حاجة تاني

آه ياريت بس تقفلي الباب جامد عشان الواد فلسطين ميدخلش

حاضر يا ابني

مشهد 3 : مصر مع الجزاير والسودان فأوضة السودان

(مصر داخلة من الباب,شبشب طاير في ال هوا خبط فيراس مصر)

آآآآي يا ولاد الكلب..(وهنا تبرز نقطة خلافية...هل ممكن طفل كلب انابيب؟)..مين اللي حدف الشبشب

أنا..(نلاحظ هنا إن الجزاير واخدة مطوة تحت عينها)..ليكي شوق فحاجة؟

أنا مش هسكوت..أنا هقلب عليك الدنيا...

السودان:يا ماما اهدي..مفيش خساير كبيرة حصلت..

طب اطلعي بقى بالفلوس اللي عندك..والفلوس اللي إنتي مدياهاني استثمرهالك هاخد منها اتاوه...

مشهد 4 : مصر مع لبنان

نعتذر عن تغطية المشهد بعد قراية الخبر ده

الخارجية المصرية تدعو إلى(عدم تضخيم) مقتل الشعب المصري في لبنان

مشهد 5 : مصر قعدة لوحدها فياوضتها

(مصر بتكح)ياه الواحد عجز قوي..والعيال كبروا وبقوا أكبر مني فيكل حاجة ماعدا السن..يا ريتني كنت اتجوزي زي بقيت الناس وكنت جبتلهم اب يشكمهم..مش كفاية جواية بايظ من المرض والنيلة اللي جوه..وكمان العيال بره قرفني..

نهاية 1 : (مشهد جنائزي..ونعش ملفوف عليه علم مصر)

نهاية 2 :(مصر في عيادة طبيب..يوصفلها دواء لتصحيح أعضائها الداخلية)

(بعد فترة زمنية غير محددة..مصر تعود إلى كامل صحتها..وتتحكم في اولادها تاني)

شوية حاجات:

جدار عازل بين مصر وغزة

مجمع البحوث الإسلامية يؤيد بناء الجدار العازل ويصف المعارضين له بالمخالفين للشريعة

الخارجية المصرية تدعو إلى(عدم تضخيم) مقتل الشاب المصري في لبنان

ساويرس يطلب لقاء رئيس الوزراء الجزائري لبحث أزمة "جيزي"

اسرائيل تعرض الوساطة لإنهاء الأزمة بين مصر والجزائر

Happy Birthday

Sunday, April 18, 2010

الرجالة اللي رأسهم بتلف

النهرده هنتكلم عن تكملة للنظرية اللي فاتت..نظرية الرجالة اللي بتبص وراها...يعني إن صح التعبير..اللي فاتت دي theorem

دي هتبقى corollary عليها..

تقدروا تبصوا عالنظرية من هنا:


الرجالة اللي بتبص وراها


مقدمة لابد منها:

تعريف:الرجالة اللي راسها بتلف..هم رجالة ..راسهم بتلف 360 درجة حول محورها..

السلوك:الرجالة اللي راسها بتلف..تعرفهم أما تبقى واقف في الشارع..تلاقي واحد واقف جنبك...وتكون بنت جاية من يمينه كده..تقوم عينه راشقه فأي حتة فيها...ويفضل مركز لحد ماتوصل عنده وتروح على شماله..وطبعا راسه بتلف حولين محورها..وعينه بتلف بالطول..لكي يستطيع الوصول إلى جميع الاماكن المهمة ..

أماكن التكاثر:طبعا بما إن دي corollary..ففي حاجات كتير من النظرية تنطبق عليها..أماكن التكاثر بتبقى في الشوارع الزحمة..في المولات..في الحفلات..في أي شارع فيه بنت معدية.

اهدافهم:ملهمش أهداف معينة..هدفهم يبصوا على أي بنت وكل بنت..محجبة أو مش محجبة لابسة محترم أو قالعة محترم..المهم عنده إنه يشبع رغبته الذكورية ويحس إن الست اقل منه..والملاحظ هنا إن الإختلاف عن النظرية...الرجالة اللي بيبصوا وراهم بيحبو الجانب الخلفي بس من المرأة..إنما دول معندهمش مشكلة...ممكن يبصوا على ضوافر الرجل..

Corollary 1:

مصر بقت بلد الرجالة اللي راسهم بتلف

شرح النظرية وامثلة:

فأي شارع وكل شارع فيمصر..هتلاقي واحد من النوع ده عالأقل...امشي فيسيدي جابر..عند الكبري..هتلقي واحد واقف تحتيه متخصص..أي بنت معدية تلاقي راسه لفت 360 درجة..مش مهم لابسة إيه ولا معاها حد ولا لأ..حتى الأطفال اللي هم 15-16 سنة مبيسلموش منه...

أسباب الإنتشار:يا حنان الأم..احضننننننن

المراجع:قنوات مزيكا..ميلودي..شوموفيز بعد الساعة واحدة..

أفلام من عينة حين ميسرة..قبلات مسروقة..احاسيس..الريس عمر حرب..كلمني شكرا



Wednesday, March 17, 2010

كلام كبير

البوست ده في كلام كتير مش هيعجب ناس كتير,,عشان كده أنا بقولكم من الاول أهو..

الثقافة الجنسية في مصر...

كلنا كنا زمان في مدرسة..وكلنا حضرنا الدرس إياه بتاع البيولوجي..وكلنا دماغنا قعدت تودي وتجيب..وكلنا ملقناش حد نسأله أو نعرف منه إيه الكلام ده وإزاي وفين وامتى وعشان إيه…مجرد خدنا الرسمتين اياهم..والمدرس أو المدرسة كان مكسوف يشرح..وبس كده..وكلنا بعد كده اعتمدنا على مصادر تانية عشان نعرف معلومات أكتر..سواء صحاب أو نت أو غيره..والطرق دي وصلت شوية مننا للصح ووصلت اغلبيتنا للغلط..وفي كتير من الناس لحد دلوقتي معرفوش إيه الصح وإيه الغلط (اللي هما مدخلوش طب)..

طب إيه الحل؟إيه الصح وإيه الغلط في موضوع الثقافة الجنسية؟وهل طبيعة مجتمعنا والكبت الجنسي اللي احنا فيه, مش هينفع معاه إن احنا ندرس للاولاد والبنات المواضيع دي من وهم صغيرين؟وهل إنت متخيل يوم ابنك أو بنتك جايبلك الدرس ده وبيقولك اشرحلي؟هيكون رد فعلك إيه ساعتها؟ “إنت لسة صغير".."إيه يا بنت ده عيبـ كده..لما تتجوزي هتعرفي"...

في ملحوظة لاحظتها اليومين دول..وأعتقد كتير مننا لاحظها..إن مبقاش في أطفال...تلاقي الولد عنده 12 سنة..ومعاه موبيل..ومصاحب..واتفرج على أفلام ثقافية..وتحس إنه فاضله يشرب بانجو ويبقى جرب كل حاجة...وتلاقي البنت معاها موبيل وصاحبت برضه والحياة حلوة ولذيذة...

تسأله يقولك ما أنا بشوفهم في التلفزيون كده...احمد ربنا إني مش بعمل زيهم بظبط والا كنت لقيتني داخلك بإبني في إيدي..

طيب من نظرة واقعية كده لحالة مواطن مصري (عادي) من ولادته لوفاته:

1-مدرسة...اختلاط لحد 5 ابتدائي...بعد كده انفصال..بعد كده ياخد درس البيولوجي إياه..

2-بعد كده ثانوية عامة والدروس الخصوصية واختلاط تاني..

3-بعدين كلية..وفي الفترة من ثانوية عامة لكلية بيتعرض لكمية حاجات سواء في السينما أو التلفيزيون أو الإنترنت وخلافه..تخلي اللي ميعرفش يعرف..

4-في الكلية شوية بيضعفوا وشوية بيكملوا..وشوية بيشعروا بالكبت الجنسي الشديد لدرجة إن هم بيحبوا ينشطو في المواسم والاعياد ويطلعوا على ازحم حتة فيكي يا مصر..وأنتم عرفين الباقي..

5-بعد كده ييجي وقت الجواز..وتلاقي التناقض بتاع الشخصية المصرية ظهر..تلاقي الواد من دول عايز بنت بيضا..ميح..متعرفش الالف من كوز الدرة...والبنت تبين للواد من دول إنها بيضا.. ميح..متعرفش الالف من كوز الدرة..

6- جوازات كتير بتحصل خلافات نتيجة قلة الوعي..وبتنتهي الجوازة..

طيب هتقولي ماالشعب المصري كان جميل وقشطة ومتأقلم..االموضوع ده جديد..اقولك صح..(حتة محمود بكر)..

إيه اللي حصل؟

1-انتشار التدين الظاهري...اللي هو صلاه وصوم وسجاير وبليل فيلم ثقافي...والبنت تبقى مأنتمه من فوق مع عَمرو خالد و مأنتمه من تحت مع عمرو دياب(عادل إمام)..مشكلة الحجاب في رأيي..إن معظم البنات مش عارفين الهدف منه..فاكرين الهدف تغطية الشعر..يعني أنا افضل بنت مش محجبة وعارفة حدودها عن بنت محجبة حجاب عمرو دياب..

2-التناقض الواضح في المجتمع..الشعب متجه في اتجاه التدين(الظاهري)..والسينما والتلفزيون متجهين اتجاه تاني خالص..هشك بشك..يعني تتوقع إيه من شاب أو مراهق عنده من 16-20 سنة ..وبيتفرج على كلمني شكرا..أو احاسيس..ويلاقي البطل عمل علاقة مع كل الستات اللي في الفيلم تقريبا..والواد آخره يعني يقعد جنب بنت في نفس الصف..

3-غالبا المشاكل دي مش بتلقيها في الصعيد أو الريف..المشاكل دي بتلقيها في المدن..ده بسبب حاجة مهمة فيرأيي المتواضع..وهو الهجرة الداخلية..يعني زمان..كان المجتمع متفتح أكتر من كده..زي مابنشوف فيأفلام زمان..ومش قصدي متفتح يعني يبقى أبيح..لأ..المهم..الفكرة إن مثلا عندنا فياسكندرية..شوف كل يوم بييجي كام ألف من الفلاحين وغيره..وشوف كام فيهم استقروا فيها..طيب لما الواحد من دول كان شغال في الغيط..ييجي يلاقي بنطلونات شترتش..وماك أب ..وباديز..هيعمل إيه؟

4-الحتة دي برده مش هتعجب ناس كتير..بس جزء من المشكلة هم البنات نفسهم..الإنفتاح اللي حصل للمجتمع نتيجة التلفيزيون وخلافه..خاله البنات منفتحه أكتر..وعايزين يلبسوا عالموضة..والبنت مبقاش عندها مشكلة إنها تلبس ضيق أو قصير ..وبعض البنات بيبقى هدفهم إنهم يتعاكسوا..

5-الأهل..الأهل بقوا منفصلين تماما عن اولادهم..صباح الخير صباح النور..تصبح على خير وإنت من أهله...أنا احترم جدا العائلة اللي بتبقى متابعة ولادها أو بناتها وتعرف صحابهم سواء الولاد أو البنات..يعني لو بنت مثلا وقايلة لأهلها على زمايلها الولاد..وهم عرفين ومتبعين معاها ومعرفينها حدودها..أنا احترم طريقة التربية دي..والعكس صحيح...

طيب إيه الحل؟كل مدى المجتمع بيتجه نحية الإنحلال أكتر وأكتر..إيه الحل؟

الحل يبدأ من الاول خالص..من المدارس..يبدأ بالتركيز على تدريس الدين الإسلامي وتعليمه من الاول..دي نقطة..

تاني نقطة..في رأيي المتواضع..مد الإختلاط لحد فترة اعدادي في المدارس...هتساعد إن الموضوع بين الولد والبنات يبقى عادي..

تالت نقطة:رقابة الأهل..ودي حاجة مهمة جدا..

رابع نقطة: إن الحكومة تستحي يعني..متمثلة في الأجهزة الرقابية..يعني مش احنا دولة اسلامية؟بلاش يا سيدي حتى دولة عربية أي حاجة..مش الافلام دي بتتعارض مع تعاليم ديننا؟ تمنعها..

خامس نقطة:رفع التوعية الجنسية الصحيحة..أنا اتبسط جدا لما سمعت إن الحكومة كانت عملة دروس للشباب اللي هم هيتجوزوا وكده..بس لقيت الناس بتتريق وبتاع..بجد كانت خطوة احيي اللي عملها عليها..

سادس نقطة ودي حاجة خاصة بالمجتمع..إن المجتمع ميزرعش في الشباب إن الست مجرد object ..كتير من الشباب بيبص عالبنات ان هما مجرد كائن ليه هدف واحد بس..وهو التكاثر..تخيل بقى البنت دي عندها قلب ومخ ومشاعر واحتياجات وواجبات وحاجات كتير قوي..

أنا عارف إني طولت عليكم قوي..وعارف إن في كلام كتير ناس هتختلف عليه..بس أنا قلت وجهة نظري وأي تعليق مرحب بيه..