السلام عليكم:النهارده انا جاي اكلمك عن "البرمجيات الحرة" *ايه يا عم "البرمجيات الحرة" دي؟ وايه الاسم ده هوا في برمجيات حرة وبرمجيات مسجونة؟
ايه يا ريس براحة عليا هوا انا لسه قلت حاجة ؟*طب انجز بالونجز
بص يا سيدي هاشرح لك معني "برمجيات حرة" برمجيات :برامج تستخدمها لإدارة كمبيوترك زي تشغيل افلام وموسيقي -مع انها حرام- وتصفح النت وزي كبير الليلة نظام التشغيل حرة: اكتسبت صفة الحرية ليس لكونها حرة ولكن بسبب انها تمنح مستخدمها حرية الاستخدام كيفما يشاء ويعمل بيها زي ماهوا عاوز يوزعها علي صحابه وينسخها ويبيعها وممكن يعدل عليها ويبيعها بعد كده*طب وايه الجديد ما انا الجهاز مهري برامج عليه وبعمل اللي انا عاوزه بيها وبوزعها علي صحابي وممكن الاقي واحد كحول ابيع له
البرنامج ده
ايوه الجهاز عندك مهري برامج مكروكة -بالكراك- و عمال تنزل ويندوز من ماي ايجي بالسيريال نمبرز وغيره من البرامج*ايه الاحراج ده؟
يا عم مافيهاش احراج ولا حاجة كلنا كنا كده بس ربنا تاب علينا :D *وطب فيها ايه ما الناس كلها بتعمل كده؟
في اوربا والدول المتقدمة :D بيهتموا بحقوق الملكية يعني لو انت عملت كده في امريكا ممكن تتسجن لانك في نظرهم سارق*يالهوي ليه يا عم؟
علشان البرامج دي محمية برخص وانت قبلت تلك الرخص ومش بتحترمها *ازاي يعني وايه علاقة رخص العربيات بموضوعنا؟
لا يا عم رخصة يعني انا مثلا عملت برنامج وعاوز اطلعه للناس وعلشان انظم الحكاية دي يبقي في حاجة اسمها رخص يعني الرخصة دي اتفاقية بين صانع البرنامج ومستخدمه وا ي واحد يخالف بنود تلك الاتفاقية يتم محاكمته.يعني في رخصة ويندوز ممنوع تدي واحد نسختك*وطب ليه مش بيحصل كده في مصر ده لو طبقوا القوانين دي هايسجنوا البلد كلها؟
لاحظ اني قلت لك "في اوربا والدول المتقدمة"*طب اشطة انا كده في السليم ما دام مفيش قوانين ملكية فكرية في مصر
وفين ضميرك انك تسرق شغل واحد عمله وهناك بعض الفتاوي التي تفتي بحرمانية استخدام برامج عليها حقوق ملكية مادام توافر البديل.*طب وايه البديل؟
"البرمجيات الحرة"*طب والحاجات دي مش ليها برضه رخص وكده؟
اه طبعا ليه بس بتحترم المستخدم يعني يتمنحك حقوقك كاملة يعني ممكن تدي صحابك نسخ من اي برنامج حر *طب و ايه نظامها دي في الفلوس ما مش علشان التزم بالرخص يبقي ادفع فلوس انا مش بزرع الفلوس دي؟
لا يا عم معظم البرمجيات الحرة مجانية لسعر*حدد معني "معظم" انا مش مستريح لها ومش مستريح لك من ساعة ماكلمتني؟
ليه كده يا ابو صلاح ده انت حبيبي *انجز
طب بص البرمجيات الحرة زي ما المستخدم العادي بيستخدمها برضه الشركات بستخدمها في اغراض تجارية فبالتالي البرامج اللي بتحتاجها الشركت بتكون بفلوس وبمبالغ مش مبالغ فيها اوي يعني*ههههههه يعني انت بتقول ان في برامج ممكن اوزع نسخ منها واعدل عليها وممكن ابيعها واعمل بيها اللي انا عاوزه وكل ده من غير فلوس وقانوني انت بتضحك عليا؟
لا والله*امال ازاي واحد يضيع وقت ومجهود حتي من غير ما يقبض مليم واحد؟
ده يا معلم موضوع كبير محتاج تركز معايا شوية*ايوه انا معاك
بص البرمجيات الحرة دي مش مجرد برامج حرة تتيح للمستخدم حرية استخدامها وما إلي ذلك دي اسلوب حياة إزاي اقولككان زمان في نظام تشغيل اسمه اليونكس عارف يعني ايه نظام تشغيل الاول؟*اه يعني ويندوز
لا نظام التشغيل ده برنامج كبير اوي مسئول انه يدير الهاردوير بتاعك علشان يعملك خدمة معينة ونوع منه هوا ويندوزوفي كمان حاجة اسمها لينكس مش موضوعنا دلوقتيعلشان نقربها في حاجة اسمها فريق كرة قدم ومن انواعه الاهلي والزمالك والاسماعيلي اهو بقي نظام التشغيل ده هوا فريق كرة القدم والويندوز هوا الزمالك :P خلاص فهمت يعني ايه نظام تشغيل؟*اه
طيب نعود لموضوعناكان في زمان نظام تشغيل اسمه يونكس .يونكس ده كان شبه ويندوز بالظبط دلوقتي بفلوس كتير اوي وكان زي الزفت يعني مش حلو خالص ومش بيحترم حرية المستخدم وبيجبره علي اشياء معينه منها انه مش ممكن يشوف اليونكس ده اتعمل ازاي ومش ممكن توزع نسخ علي اي حد راح طلع واحد مطور اسمه "ريتشارد ستالمن" والراجل ده ماكانش بيحب حد يلوي دراعه وقال احنا مذلولين ليونكس ده ليه راح الناس قاله له علشان مفيش غيره قال خلاص انا هابني برمجيات حرة للناس الحرة اللي زيي ومن هنا كانت بداية الحكاية والراجل ده كان عامل مشروع علشان يعمل نظام تشغيل زي اليونكس بس يكون حر ويحترم حرية المستخدم.*والله راجل زي الفل وبيفهم طب الحوار ده نجح؟
ايون الحوار ده نجح ومن اعظم نتائجه ظهور نظام تشغيل 100% حر اسمه جنو\لينكس اللي احنا بنقول عليه اختصارا لينكس*طب ممكن تديني مثال للبرمجيات الحرة علشان الصورة توضح
office بدل ال open office وفي بدل الانترنت اكسبلورر الفاير فوكس وفي كمان gimp بدل الفوتوشوب في
وبرامج تانية كتير اوي اوي *اشطة طب البرامج دي هاتشتغل عادي علي ويندوز؟
ماشي*ومالك بتقلها بنفس غير راضية كده؟
اصل مش معقول واحد يعجن عجينة تورتة في كروانة غسيل *ايه يا عم الحلواني الكلام المريب ده؟
قصدي يعني انت هاتبدأ بإستخدام البرمجيات الحرة وانت اصلا بتستخدم نظام غير حر ورخصته مش معاك وانت وخده مكرك -بكراك-*قصدك علي ويندوز؟
ايون*طب هوا في بديل؟
طبعا انا مش قلت لك ان في البرمجيات الحرة في بدل البديل الواحد عشرة*لأ مقلتش :P
اديني قلت لك يا لمض :D*طب بديل ويندوز ايه؟
في حاجة اسمها لينكس كده زي الفل*بص انا عندس سؤال وخايف اقوله تزعل مني
اتفضل عادي*انا حاسس ان البرمجيات الحرة دي هاتطلع اكتر مقلب اخدته في حياتي
ليه؟*اصل مش معقوله ان واحد بيعمل برنامج ويسمح للناس انها تعدل عليه ويديله الحريات دي كلها ويكون برنامج كويس
حاسس ان البرمجيات الحرة دي كفاءتها مش ممكن تصل لمستوي البرمجيات الغير حرة والغالي تمنه فيه
بص يا سيدي مشكل حاجة بالفلوس طب اقولك حاجة حلوة*هريسة؟
لأ انت عارف ان المواقع اللي علي النت بيخدمها سيرفرات سيرفرات يعني كمبيوترات لها امكانيات ضخمه اوي اوي علشان تقدر تشغل الموقع صح؟*اه وطب السيرفرات دي بتشتغل بنظام تشغيل ايه؟
بمعظمها بيشتغل بنظم تشغيل حرة زي اللينكس وغيره*ياه معقولة؟
طبعا لان لينوكس علي قدر جامد من الكفاءة والاستقرار والامان ولعلمك لو عملنا مقارنة بين ويندوز ولينكس النتيجة هاتكون لينكس يكسب من الجولة الاولي*طب يا عم الفقيق مادام لينكس كده جامد ليه ويندوز منتشر اوي كده؟
نقطة كويسة علشان ميكروسوفت شركة غنية جدا فبتستغل الاموال دي في نشر الويندوز للمستخدم الذي لم يسمع عن انظمة اخري يعني انت لما تشتري لابتوب تلاقي ويندوز جي عليه لما اخوك الصغير يروح المدرسة يلاقي المناهج متفصله علي ويندوز كله بالفلوس مش بالتقنية*ياه طب الكلام ده جميل وعجبني فعلا لكن ممكن تراجع معايا الاسباب اللي ممكن منها اتحول لاستخدام البرمجيات الحرة؟
ماشي 1) بإستخدامك للبرمجيات الحرة انت كده بتكون حر في جهازك شرعا وقانونا ومحدش ليه عندك اي حاجة2) انت لما تكون ماشي قانوني هاترتاح ازاي؟ توزع براحتك علي صحابك مش لازم تدور علي كراك 3) لما البرامج الحرة ينزلهاUpdate انت هاتستفيد بيه غير البرامج الغير حرة اللي بتشترط انك تدفع4) لما....*كفاية كده طب عندي سؤال لو احب ابتدي استخدم برامج حرة انت قلت لي استخدم لينكس صح؟
ايوه*انا سمعت ان لينكس ده معقد جدا هوا حلو بس للناس المحترفين صح؟
لا مش كده دلوقتي اللينكس بدأت تظهر منه نسخ زي اوبنتو تستهدف المستخدم العادي*طب وبرامجي اللي علي ويندوز هاتشتغل عليه؟
ما انا رصيت لك كمية برامج فوق بدايل لبرامجك القديمة*طب هي بنفس الكفاءة؟
يكفيني القول بأن مطوري تلك البرامج شركات عريقة منهم شركة sun و IBM والعديد والعديد من الشركات*طب وبالنسبة للالعاب؟
للاسف اللينكس مش بيشغل العاب الويندوز هوا ليه العاب خاصة بيه بس بنفس كفاءة الويندوز*هاهاهاوقعتك في شر اعمالك معني كده ان اللينكس ضعيف من ناحية الجرافكس؟
لا يا عم اصلا اللينكس بيستخدم مكتبة جرافكس اسمها openGL دي اقوي من اللي بتستخدمها ميكروسوفتDirectX ومعظم شركات الالعاب نصحت ميكروسوفت تحذة حذو لينكس وتستخد مكتبة openGL*طب ايه الحكاية ليه لينكس مش بيشغل العاب وجامدة؟
لان برمجة الالعاب من اصعب البرمجيات لذلك الشركات التي تبرمج الالعاب تحتاج فلوس وهي ليست علي استعداد لتضييع وقتها وجهدها من اجل حرية المستخدم وانا عن نفسي لا اعتبر الكمبيوتر منصة العاب منصة العاب هي البلاي ستيشن اكس بوكس الحاجات الحلوة دي*براءة يا ريس والبرمجيات الحرة دي عجبتني وكذلك اللينكس ابدأ منين؟
حمدلله علي السلامةانت ممكن تنزل اوبنتو وده نظام تشغيل زي الويندوز وحلو وسهل التعامل وهايبقي نقطة انطلاقك في عالم البرمجيات الحرة*طب هوا الاوبنتو ده ممكن اركبه عادي جنب الويندوز؟
طبعا واي مشكلة تظهر معاك خليك وراها وصدقني ها تتعلم حاجات كتير اوي في الكمبيوتر ويندوز ماكانش بيديك الفرصة لتعلمها*طب هلاقي حد يساعدني؟
حد؟!!!! ده انت هتلاقي حدود مش حد زي ماقلت لك ان البرمجيات الحرة دي اسلوب حياة مش تقنية يعني هتلاقي ناس كتير زيك ومستعدين يساعدوك اشهرهم ubuntuforums.com
linuxac.org
linuxquestions.org*طب لو حبيت اتصل بيك ابهدلك او اسألك او اي حاجة؟
ماشي يا عم mhm.aboelnour@gmail.comوادي البلوج بتاعي maboelnour.wordpress.com*شكرا يا عم انت كنت فين من زمان
العفو يا عم بس لما توصل ماتنساش غيرك
--------------------------------
خارج نطاق التدوينة:
دي اول تدوينة ليا علي مدونة عثمان حبيبي اتمني اني اكون ضيف وشه حلو
وبرضه ده اول موضوع اكتبه عن البرمجيات الحرة بالاسلوب العامي ده فأتمني انه يلقي استحسان الناس
:D
اي
Feedback
يرجي اخباري
قراءة ممتعة
