مضغوط

- اكتشفت إن أنا بحب الكرة قوي قوي قوي لدرجة إني بشارك ومن غير معرف فتدعيم فرق الكورة..من امثال المصرية للاتصالات وانبي وبتروجت..امبارح أما جت فاتورة الغاز بصيت كده قعدت ادور في ال100 خانة المكتوبين هل في خانة اسمها تدعيم انبي أو بتروجت..ملقيتش..دورت ففاتورة التليفون في ال200 خانة ملقيتش برده...بس لقيت خانات كتير مبهمة كده ممكن تغطي الموضوع ده..زي النداء الآلي..مش ممكن دي تكون ثييم مابينهم؟ "إيه النداء الآلي عمل إيه النهرده ؟ -أهو كسب بـفرق جونين الحمدلله وفضل في الدوري"

- حاجتين بيقرفونا بيهم من ساعة متولدنا ومش شايفهم لحد دلوقتي..واحدة اتكلمت فيها قبل كده..وهي مصر أم الدنيا..وأرض الحضارة...و7000 سنة ..الا ماشفت حد في العالم بيسمع كلام مصر غير "السلطة الفلسطينية"-بفتح السين أو ضمها إنت وذوقك-..تاني حاجة يقولك إيه.."اينما تذهب في مصر تجد ان الروابط بين الجيران وبعضهم البعض قوية..فـاحزانهم واحدة..وأفراحهم واحدة..وعيدهم واحد..حيث يتبادلون التهاني و الهدايا والأطعمة المختلفة"..وأنا بفكر في الموضوع ده..خدت بتاع 5 دقايق عشان أفتكر اسم جارنا اللي تحتينا..وفكرت إن أكيد اللي كتب الكلام ده كتبه فعلا عن حاجة حقيقية ومكنش بيحور...وأكيد الكلام ده كان موجود فزمن من الأزمنة السحيقة..

ناس هتقولي لأ فعلا الكلام ده بيبقى موجود في الحارات والأماكن الشعبية..هقولك على راسي من فوق..بس برضه في الأماكن الشعبية في الأفراح بيفتحوا ازايز ويدخنو الماريجوانا -الحشيش- فـالاماكن الشعبية مش مثال يحتذى بيه.

- ليا واحد صاحبي اسمه طارق..عنده 29 سنة..اتولد فيظروف صعبة...قيصرية...ومامته اتوفت وهي بتولدو... ومن ساعة ما اتولد والمصايب بتحصل حوليه..عبارات بتغرق..قطرة بتخبط فبعض...جبال وبتقع عالناس...دم وبيتلوث..شعب وبيت***..نهر النيل وهيقطعو..رشاوي فيكل حتة..حروب فكل حتة...واللي زاد وغطى إنه أصلا مولود بحالة نفسية..بيحب يدمر الناس كلها...بيغتصب ويقمع ويقتل ويتحرش ويسجن..امبارح كان مقضي اليوم في المستشفى كان عيان وبيموت...ناس كتير كانت تتمنى موته..وناس كتير لأ..والناس دي هي اللي قدرت تقوموا من ازمته..وعاش سنتين تانية كمان...

امبارح كان عيد ميلاد طارق..كل سنة وإنت طيب يا طارق..

- عارف احساس إنك تبقى قاعد كده فامان الله..وعامل حسابك إن الإمتحانات كمان شهر.. 3 اسابيع بالميت..وتلاقي فجأة حد بيقولك الإمتحانات كمان اسبوعين..احساس رائع..انصحك تجربه فوقت من الاوقات..

Tweet

عقوق

مع هوجة بس يا سيدي.. وقامت معيطة..ومع حلول ذكرى مهمة بكرة(4-5-2010)..ومع قعدتي مع السفيرة الأمريكية في قاعة واحدة امبارح..فكرت..أيوه فكرت-عارف إنها حاجة غريبة-..فـقلت..مصر..علمونا من زمان إن مصر أم الدنيا..ومش حأليش الالشة التيت ..طب مين ابوها..أنا هأليش الشة أزبل..طيب جبتهم ازااااااي؟ وبعد تفكير عميق..وبعد متفرجت على فيلم جنيفر لوبيز الجديد...اكتشفت إن هم أطفال انابيب..أيوه انابيب..ماما مصر..جابت بقية الدول..بالانابيب..وده يفسر العقوق اللي فيه الدول دي..

لأ وخيالي شطح أكتر وأكتر..قعدت اتخيل بيت مصر عامل إزاي..أكيد زحمة..أكيد بيبقوا وقفين طابور عالحمام..أكيد فيه أطفال من كل الاعمار..وأكيد كلهم رجالة ماعدى مصر..

مشهد 1 : مصر قعدة مع إسرائيل و"السلطة الفلسطينية":

بس يا واد إنت وهو..وجعتوا قلبي..إلهي ياخدوا ويخلصني منكم..

ماما..فلسطين بتضربني جامد يا ماما..

كذاب أنا ضربتك ضربة خفيفة..إنت بتضرب أكتر من الضربة..

يا جماعة لازم تلتزمو بضبط النفس..مش كل شوية كده وجعتو دماغي..واد يا فلسطين..أنا هقفل عليا الاوضة بباب فولاذي أنا وإسرائيل ومش هدخلك خالص عندنا..

مشهد 2 : مصر قعدة مع امريكا

مصر بصوت واطي: إزيك يا ابني..قولي البس إيه النهرده

البسي الفستان الاخضر عالشنطة الحمرا

حاضر..تاكلو إيه النهرده؟

ناكل محشي وجمبري وفراخ ومانجة وكيك

حاضر يا ابني..عايز حاجة تاني

آه ياريت بس تقفلي الباب جامد عشان الواد فلسطين ميدخلش

حاضر يا ابني

مشهد 3 : مصر مع الجزاير والسودان فأوضة السودان

(مصر داخلة من الباب,شبشب طاير في ال هوا خبط فيراس مصر)

آآآآي يا ولاد الكلب..(وهنا تبرز نقطة خلافية...هل ممكن طفل كلب انابيب؟)..مين اللي حدف الشبشب

أنا..(نلاحظ هنا إن الجزاير واخدة مطوة تحت عينها)..ليكي شوق فحاجة؟

أنا مش هسكوت..أنا هقلب عليك الدنيا...

السودان:يا ماما اهدي..مفيش خساير كبيرة حصلت..

طب اطلعي بقى بالفلوس اللي عندك..والفلوس اللي إنتي مدياهاني استثمرهالك هاخد منها اتاوه...

مشهد 4 : مصر مع لبنان

نعتذر عن تغطية المشهد بعد قراية الخبر ده

الخارجية المصرية تدعو إلى(عدم تضخيم) مقتل الشعب المصري في لبنان

مشهد 5 : مصر قعدة لوحدها فياوضتها

(مصر بتكح)ياه الواحد عجز قوي..والعيال كبروا وبقوا أكبر مني فيكل حاجة ماعدا السن..يا ريتني كنت اتجوزي زي بقيت الناس وكنت جبتلهم اب يشكمهم..مش كفاية جواية بايظ من المرض والنيلة اللي جوه..وكمان العيال بره قرفني..

نهاية 1 : (مشهد جنائزي..ونعش ملفوف عليه علم مصر)

نهاية 2 :(مصر في عيادة طبيب..يوصفلها دواء لتصحيح أعضائها الداخلية)

(بعد فترة زمنية غير محددة..مصر تعود إلى كامل صحتها..وتتحكم في اولادها تاني)

شوية حاجات:

جدار عازل بين مصر وغزة

مجمع البحوث الإسلامية يؤيد بناء الجدار العازل ويصف المعارضين له بالمخالفين للشريعة

الخارجية المصرية تدعو إلى(عدم تضخيم) مقتل الشاب المصري في لبنان

ساويرس يطلب لقاء رئيس الوزراء الجزائري لبحث أزمة "جيزي"

اسرائيل تعرض الوساطة لإنهاء الأزمة بين مصر والجزائر

Happy Birthday

Tweet

تحرش

كانت تسير عائدة إلى منزلها..

تفكر..

تفكر فيه..

ماذا تفعل..

اتخبر أهلها؟

اتحتفظ بحبها له؟

كانت في حيرة من أمرها..

اوشك عقلها على الإنفجار..

نسيت طريقها..

لم تلحظ أنها اتجهت إلى طريق مظلم..

طريق كثير الشبه بـمستقبلها..

فجأة سمعت صوت نباح..

أحست بالشعيرات في مؤخرة رأسها تنتصب..

فجأة عادت إلى وعيها..

ادركت انها تسير في طريق مختلف..

طريق لم تعتاد عليه..

اخذت تنظر حولها..

بنايات مختلفة..

لم تجد عم أحمد..

لم تجد مكتبة النور..

اين ذهب مسجد التقوى؟

ادركت انها تائهة..

أحست بنبضات قلبها تتسارع..

نظرت في ساعتها...

الثانية عشرة بعد منتصف الليل..

كان عقلها يفكر بسرعة تقارب سرعة جهاز الحاسوب..

اتتصل بأهلها؟

اتبحث عن طريق مألوف؟

لم يستطيع عقلها ان يفكر بمنطقية..

قررت ان تستمر في طريقها..

"كل الطرق تؤدي إلى روما"..

كانت أول فكرة جالت بخاطرها في هذه اللحظة..

ارتفع صوت النباح..

"مش فارقة"

قررت ان الامور لايمكن ان تزداد سوء..

سارت...هرولت...زحفت...تباطأت...

لم تدرك كم من الوقت مضى..

لم تدرك كم من الكيلوات قطعت..

سمعت صوت بشري..

أحست بطاقة تدفعها ..طاقة أمل..

لم تتبين مايقولونه..

اتجهت ناحية الصوت..

الصوت يقترب..

حاولت ان تركز حواسها لتسمع مايقولونه..

اقتربت أكتر..

"خد لف السيجارة دي يا علي"

تسمرت..

لم تستطع الحركة..

كان الأوان قد فات..

أحست بعشرات من العيون الجائعة تنظر اليها...

عشرات من العيون المحكومة بعقول مغيبة..

كان عقلها يفكر أسرع من جسدها..

قررت الهروب..

لماذا مازالت متسمرة في مكانهـا؟

تحركت أخيرا..

اخذت تجري..

تهرب..

صوت النباح يزداد مما يضفي على الموقف طابع أفلام الرعب..

أحست بعشرات بل مئات الأقدام تلاحقها..

"البت دي هتتظبط النهرده"

كاد قلبها أن يقفز من ضلوعها..

اقتربت الخطوات أكثر فأكثر..

أحست بالاقدام تتفرق..

اتجهت مجموعة امامها...

ومجموعة خلفها..

حاصروها..

اقتربوا أكثر فأكثر..

ارتفع صوت النباح..

تجرأ أحدهم ولمسها..

صرخت..

تمنت لو انها لم تذهب إلى حبيبها في هذا اليوم..

أحست بأنها الكارما..

اقترب آخر وأسقطها أرضا..

اهتاج الجمع لهذه الحركة..

قرروا الهجوم..

اغمضت عينيها..

"مش فارقة"

أحست بصداها في عقلها..ثم فقدت الوعي...

.......................................

Tweet

ذكريات 1

امبارح وأنا عالسرير كده..لقيت شريط حياتي المدرسية بيعدي قدامي..من ابتدائي لاعدادي ل ثانوي..معرفش إيه السبب..يمكن المعاناه بتاعت الكلية..وال 15 مليون بروجكت اللي لازم نسلمهم...المهم..افتكرت حاجات قديمة قوي..وحاجات ملهاش لازمة..وحاجات ضحكتني..وحاجات حسستني إني كنت محترم قوي..فـحبيت أشارك الحاجات دي معاكم..يمكن حد تعجبه الفكرة ويفتكر أيام المدرسة ويكتب..

ابتدائي:

اكتر ذكريات عندي من مرحلة ابتدائي..

يمكن عشان أكتر فترة فيها نقاء..فيها طفولة..فيها شقاوة أطفال..مع إن زي ماهيبان قدام إن احنا كنا سابقين سننا..

هبدأ الموضوع من سنة 4 .. من أول مادخلت مدرسة سموحه التجريبية ..أيوه اللي عند سعد راشد كده..من اللي أنا فاكره..إني كنت اتمتع ساعتها بجاذبية شديدة..من الاخر كنت البوب بتاع دفعتي..بتطلع عليَّ إشاعات حب..وكنت دحيح الدفعة برده..أنا فاكر فمرة..مدرس العربي الله يمسيه بالخير..نتيجة امتحان الشهر طلعت..وأنا كنت ناقص نص درجة وكان في بنتين جايبين الدرجة النهاية..نانسي وكريستين..المهم قاعد يقولهم مبروك ويهزر معاهم وبتاع..أنا لحد دلوقتي فاكر احساس الاحباط والزعل اللي كنت فيه-واضح إن كان عندي دم ساعتها-المهم بعد كده فضلت أطلع الاول لحد مامشيت من المدرسة دي...

فاكر موقف تاني..اثر فيَّ قوي..مع نفس المدرس..المهم هو كان طالع..وطلع واحدة-يارا- تقف عالفصل وقالها اكتبي أسامي اللي بيتكلموا..المهم أنا عند فيها اتكلمت وكتبتني..أول ماجه..شاف اسمي..قام قاعد يلطشني بالاقلام..أيوه بالاقلام..أنا قعدت عالديسك اعيط..لحد الراجل ماجه وصالحني وقال لي معلش أنا بس بعمل كده عشان مصلحتك..كرهت يارا اليوم ده قوي..

كان عندنا مدرس عربي تاني..كان شاب كده..وكان بيحبني وأنا بحبه قوي..المهم..مرة جه موجه..فـقام عماد-المدرس-وقفني عشان اجاوبه عشان هو عارف إني كويس يعني..المهم قام الموجه ده قال لي بكار أو حاجة كده-عشان أنا اسمر-فـأنا دمي فار ساعتها وجاوبته غلط..بعدهامستر عماد قال لي جاوبت ليه غلط وأنا متأكد إن إنت عارف الإجابة رحت قلتله إن أنا كنت عارف الإجابة بس كلمته هي اللي غاظتني..

كان عندنا مدرس رياضيات بحبه قوي..كان طويل قوي اسمه عادل..المهم مرة كان في واحد اسمه حسام ده كان فخامسة وأنا فرابعة..الواد ده كان فتوة المدرسة..المهم مرة غلس على أختي عشان هي سمرة وكده..قمت أنا رايح..وواجهته..المهم اضربت-شيء منطقي-بعديها رحت قلت للمدرس ده..قام جاب الولد..في الطابور الصبح..وخلاة يعتذرلي ولأختي..ويبوس راسي..الراجل ده آنا بحترمه لحد دلوقتي..

نانسي دي بقى-اللي ذكرتها فوق-ليا معاها حكاية لطيفة..زي ما أنا قلتلكم أنا كانت بتطلع عليَّ إشاعات كتير..المهم كان في إشاعة مرة إن أنا بحب نانسي..ونانسي سافرت امريكا..والكلام زاد عليَّ أنا ونانسي..لحد مامرة جت مدرسة العلوم-science – عندنا الفصل..وقالت إيه الكلام اللي بيتقال ده وعيب كده دي مسافرة ومتتكلموش على حد وهو مسافر وكده..المهم نانسي دي فأمريكا كانت بتطلع الاولى عالفصل علطول...

وفي برضه تكملة لحوار الإشاعات..مرة طلعت عليَّ إشاعة إني بحب واحدة-اعتذر عن ذكر اسمها-لقيتها اليوم اللي بعده جايبة مامتها..ومامتها بتكلمني..بس مش فاكر بظبط كان إيه الموقف ساعتها..

كان عندنا امينة مكتبة..كانت حلوة قوي..وكنت أنا معجب بيها..أكيد كلنا مرينا بمرحلة طالب-مدرسة..المهم اتصدمت لما لقيتها اتخطبت لمدارس الالعاب عندنا..زعلت قوي..

شايفين قد إيه فترة ابتدائي كانت ثرية بكل حاجة..حب وخلافات وتفوق وعنصرية وكله..

وللحديث بقية مادام في العمر بقية..

Tweet