9/ 20

لأول مرة اجرب احساس الفشل العلمي...

الحكاية بدأت من أيام امتحانات الميدتيرم...كان يوم غريب كده وماده اغرب مكنتش فاهم منها حاجة..وقعدت احفظ زي البغبغان الصحراوي...

احفظ واحشر في قوانين...

وضربتلي شيتين كده الصبح قبل الإمتحان على أمل إنه يعني ينفع...

المهم اليوم كان باين من أوله...السكة كانت زحمة...وصلت الإمتحان متأخر 10 دقايق..الإمتحان كله ساعة أصلا..

دخلت لجنتي..اذ أفاجأ إن مفيش ورق اسئلة..والراجل بيديني ورقة إجابة...فكرت لوهله إنه فاكس اسئلة وأالف اسئلة واجاوبها..بس قلت بلاش أحسن أنا عارف مستوى تفكيري اعلى من الدكتورة ممكن تتلخبط ولا حاجة..

فقلت للمعيد وبتاع...قال لي طب نعمل إيه..اطلع اللجنة التانية...طلعت اللجنة التانية...كان فات ربع ساعة خلاص...

ببص على ورقة الاسئلة لقيتها 3 اسئلة...خير وبركة...

ببص عالاسئلة..ويا ريتني مابصيت...

مش كنت الفت اسئلة أحسن...

المهم قلت اجرب...قعدت اخبط كده في المسألة الاولى...وصلت لنتيجة نهاية بس طبعا غلط...

قلت خير وبركة برضه ندخل علي بعدها...

المسألة التانية 3 مطالب,أول واحد مشيت في شوية..

التاني بقى...عايز MLE للاكسبكتد..الكلام ده مشفتوش قبل كده...اكسبكتد اكسبكتد...مم..طيب نسبها...وأكيد المطلوب التالت شبهه كده..أدخل علي بعدها بقى..

المسألة الأخيرة..أحمدك يارب..

متقسمة جزئين...

الاولاني...شكله مألوف كده مش عارف..أحاول فيه كده...

مم..ماشي ماشي..قشطة

حسيت إني أديت فيه..

الجزء التاني..آه الكنفيدنس انترفل..عارفه ده..بتاع الU وال L

طب أما اخبط كده....

دي كاي باين..مش عارف..قشطة قشطة..

ببص في الساعة كده...لقيت لسة فاضل ربع ساعة..

اراجع ولا احل ولا أعمل إيه...

أنا هخلع بقى..كده تقريبا تلت الإمتحان..قشطة قوي..

قمت ورحت اسلم الورقة...لقيت إني متبوع بنظرات الاعجاب من الطلبة الاخرين...لسان حالهم بيقول:إيه الواد الدحيح ده..جاي متأخر ربع ساعة وماشي بدري ربع ساعة...الواد ده وصل خلاص..

واليوم ده كمان كان آخر يوم امتحانات...فـنزلت بعدها وقشطة ولا اكن حاجة حصلت...

من أسبوع كده نتيجة الماده دي طلعت بالصلاة عالنبي..

الدكتورة قبل متوزع الورق قالت في 9 شايلين الإمتحان...هعملهم امتحان اعادة..

هي قالت كده من هنا..وأنا لفيت على واحد واحد اقوله إني من ال9 الشايلين...

لقيت ورقتي..كام كام...9..9 من 20..

ياه فرقت بنط..

المهم عشان مطولش عليكم...

اديني بذاكر أهو دلوقتي عشان امتحان الاعادة ..

امتحان الاعادة بعد ماسقطت لأول مرة في حياتي...

ادعولي..

Tweet

Exams %$#@%^&$#

الإمتحانات تدق الباب..افتحوا يا شباب..

طبعا زي ماكلنا عرفين..الفينالز خلاص قربت...والواحد لازم يحترم نفسه بقى ويبتدي يذاكر..بدل مانلبس المقبول المتين..عشان كده أنا هاقلل من البوستس شوية...ادعولنا بقى...وآدي حبّت صور امتحانات..

ربنا معانا جميعا في الامتحانات...حظ سعيد

Tweet

اثبات حالة

التاريخ:16 ديسمبر 2009

المكان:الاسكندرية

الزمان:طول اليوم

الحدث:جو غريب مريب...مليان تراب...ومليان ورق بعد ماتحرق...ومليان حاجات غريبة

الجو خنقة..الناس مش عارفة تتنفس

الإستنتاج:السحابة السودة وصلت اسكندرية يا رجالة

Tweet

سيادة الرئيس - جزء 3

الجزء الاول

الجزء التاني

أما أدخل أنام بقى لحسن تعبت النهرده قوي..
يارب احلام بحاجة عدلة النهرده..

في الحلم:
مواطن مصري واقف في طابور العيش وبيتخانق على مكانه مع واحد تاني...قام الراجل التاني مطلع مطوة وغزه..
مواطن مصري تاني راجع من الخليج لأهله في عبارة...العبارة تغرق بيه وبالناس اللي معاه..
مواطن مصري رايح ايطاليا..بطريقة غير شرعية..فيمركب شايلة 30 نفر واخرها تشيل 2...المركب تغرق بيهم..
مواطن مصري راح يتبرع بالدم ..واتبرع كذا مرة...وفي الآخر يكتشف إن الدم بتاعه باظ عشان الاكياس الفاسدة..
مواطن مصري اتصاب في حادثة..رايح يدخل المستشفى..قالوله لازم يدفع 1000 جنيه تحت الحساب..وهو عمال ينزف..
مواطنة مصرية تعبانة عندها برد...راحت تكشف قالولها معندكيش حاجة..تاني يوم اتوفت نتيجة انفلونزا الخنازير..
مواطن مصري بيقبض 300 جنيه فالشهر..عنده عيلة من 6 أفراد..
.........................
يا ساتر يارب إيه الحلم ده...ده الكلام ده كله بسببي...الكلام ده بيحصل في البلد نتيجة سياستي...لأ مش ممكن...
أنا لازم اوقف كل ده...مينفعش اعذب الناس أكتر من كده..
أنا لازم أسيب الحكم..
انوس..اعملي مؤتمر صحفي دلوقتي حالا...
ا:بس الساعة 4 الصبح يا ريس..
مليش دعوة..أنا عايزه دلوقتي حالا..
في المؤتمر الصحفي:
لقد اتخذت قرارا
"طب أنا لو سبت الحكم..هيعملوا فيّا إيه..دول هيطلعوا تيت اللي جابوني..."
أريدكم جميعا ان تساعدوني عليه
"طب أنا لو تنحيت كده هاضيع فرصة جيمي أو علوا انهم يمسكوا الحكم..."
لقد قررت
ده احتمال كمان يقاضوني في محكمة العدل ولا حاجة..."
عزل مجلس الوزراء كاملا متضمنا رئيس مجلس الوزراء...وتعديل المادة ** من الدستور بحيث يتم اختيار الوزراء عن طريق استفتاء شعبي عام..
تمت

Tweet

تنصيب

حفل تنصيب اتحاد الطلبة بالكليه

مش عارف ليه أول ماشفت البتاعة دي..لقيتني بابتسم ابتسامة سخرية كده

قالك اتحاد طلبة..وقالك حفل تنصيب...الحدث ده فكرني بـاعلان كده...عن اقلام بيك كانت عملاه..

يعني مش مكفيهم إن هم ساعدواالطلبة تغش لأ وبيفتخروا بالحكاية دي كمان...

طب هو مش شرط أساسي من شروط أي انتخابات أو أي حاجة فيها تنافس على أساس شروط معينة...الشرط الاساسي فيها هو العلانية؟ولا ده كان زمان...

طب ليه بتفضل نفس الوشوش في اتحاد الطلبة هي هي لحد ماتتخرج أو تموت ايهم اقرب؟هي عدوي ماشية في البلد من الكبير للصغير ولا إيه؟

استنتاجي هو إن الكلية عبارة عن مصر مصغرة...فيها انتخابات فكسانة..فيها أمن وحرس جامعي...فيها عميد يعمل أي حاجة عايزها..فيها طلبة غلبانين..فيها طلبة بلطجية...فيها روتين حكومي وفوت علينا بكرة...فيها إن مستقبل حد يبقى في ايد موظف أو دكتور حسب حالته المزاجية...الحاجة الوحيدة اللي مش فيها هي افران العيش البلدي...والطابور بتاعها..عشان كده أنا أطالب بطابور لكل كلية...طابور بس يبقى طابور من اللي هوا..مش زي طابور دفع المصاريف..لأ..عايز أشوف ناس بتموت بعض عالمكان...

كده يبقى إنت أكيد..أكيد في الجامعة (مصر سابقا)..

Tweet