"إيه أكتر حاجة عايز تغيرها في مصر؟
السلبية السياسية..اللي بتؤدي للسلبية الإجتماعية.."
رايح النهرده الكلية في أمان الله..ولابس تقيل طبعا على أساس شتا بقى وتلج وبابا نويل وكده...لقيتلك الجو حر...قلت إيه الجو اللي بيزاولنا ده..المهم..أنا ساكن في سموحة..فـعشان أروح الكلية باعدي نفق سيدي جابر واركب أبوقير...داخل بقى بقلب كده وبخطوة سريعة لقيتلك لمة كده وزحمة...قلت عادي يمكن زحمة على بتاع الكبدة ولا أبوعشرة بعشرة..نزلت النفق لقيت الزحمة لسة موجودة...وصلت النحية التانية عرفت الزحمة دي ليه...اتاري بقى الشتا بتاع الصبح مغرق النفق...وزي كل سنة الراجل بتاع النفاق حطت خشب وطوب عشان الناس تعدي من فوقه..كنت عايز اقوله مفروض يعلق ورقة قبل النفق...
" لتجاوز النفق,يشترط الخبرة في مجال الباليه..والقدرة على حفظ التوازن."..ده بغض النظر إن في سكتين...سكة للي نازل وسكة للي طالع...واحد مستعجل من النازلين يدخل في سكة الطالعين يبوظ elflow بتاع الناس...وهاتك يا خناقات...
للعلم نفق سيدي جابر ده من أهم الانفاق في اسكندرية...وبيعدي فيه الناس اللي جاية من الريف والفلاحين وجايين يشتغلوا اليوم بيومه..ده بخلاف إنه بيربط بين منطقة سموحة كلها وشارع أبوقير...
موضوع المية والشتا ده..أنا بقالي 5 سنين أو أكتر بستخدم النفق ده يوميا..كل سنة من الخمس سنين دول بيحصل نفس الموقف...لما تشتي النفق يتغرق..الراجل يحط طوب وخشب عشان الناس تعدي..ل درجة إني شكيت إنه نفس الطوب بتاع كل سنة بيحطوا تاني...طب يعني مفيش اد من السادة المسئولين تفتق ذهنه(حلوة دي؟) إنه مثلا مثلا يحفر بالوعة(حلوة دي كمان ؟)في النفق تشفط المية...أو الراجل بتاع الأمن اللي قاعد يبقى معاه جهاز معيَّن يشفط بيه المية...أو..أو.أو..في ميت حل للموضوع...بس طبعا السيد المسئول مش بيعدي من نفق سيدي جابر...فـمش فارقة معاه...والناس اللي بتعدي من نفق سيدي جابر بترضى بالأمر الواقع...مع إن ده حقها إن تعدي في نفق محترم من غير متجرب قوانين الجاذبية الأرضية للاجسام غير المستوية...ل درجة إني سمعت تعليق من واحدة بتعدي..بتقول مش كنا عدينا من جوه محطة القطر أسهل...طب يا ستي النفق ده اتعمل ليه...عشان الناس تعدي منه...
أنا باحكي الموضوع ده ليه,عشان ده مثال صغير للسلبية الإجتماعية اللي البلد بقت فيها...
مشهد 1 : واحدة ست في الشارع يوم الوقفة...ماشية في حالها...شوية شباب مشيو وراها وقعدوا يعاكسوها...واحد منهم قرر إنه يطور شوية وقرب منها...الباقي مشى وراه...اعتدوا عليها...الناس في الشارع بتتفرج..محدش بيعمل حاجة...حتى العسكري بيتفرج...
مشهد 2 :واحد بيعدي البحر من عند سان ستيفانو..بيتشاهد قبل مايعدي...مفيش نفق هناك..والسبب إن في نفق تبع الفندق..ومينفعش نفقين جنب بعض...يعني الناس تموت والسياح يعيشوا...
مشهد 3 : شوية شباب في الترام...قاعدين يهزروا بصوت عالي...وطبعا مشغلين الموبيل على أغنية الجسمي 6 الصبح...كل واحدة تعدي لازم يعاكسوها...حتى لو معاها ابوها..أو حتى لو منقبة...
طبعا أسباب السلبية الاجتماعية معروفة...من أهم اسبابها السلبية السياسية...والخمول السياسي...بخلاف الفقر...مبدأ "وانا مالي"..ومبدأ "يلا نفسي" الشهير...ومبدأ "أهم حاجة الستر" ..وقصر النظر عند الشعب والمسئولين...بخلاف أسباب تانية كتيييير...أسباب مينفعش تروح في يوم وليلة...أسباب عايزة جيل بحاله يروح وييجي بداله جيل جديد...
أنا بقى من موقعي هذا بأقول..يا أهل الله..نفق سيدي جابر...عايزين حل للمية اللي فيه...اللهم بلغت!
