سيادة الرئيس - جزء 1

الجزء الثاني

الجزء الثالث

كنت قاعد كده بفكر في ماتش مصر والجزائر واللي حصل بعدها...جه في دماغي من نظرة تانية خالص...الريس بيعمل إيه دلوقتي..قلت اتخيل يوم في حياة الريس...ده الجزء الاول..لو فضلت عايش بعد ده هاكتب الجزء التاني..

------------------------------------------------------

هاااا..سيبني أنام شوية...الساعة كام؟ 9.. لسة بدري ياعم...إيه بتقول إيه؟ميعاد مع مين؟ رئيس تشاد..يييه حاضر.

حضرلي الحمام يابني...تعالى يابني شلني من السرير عالحمام...تعالى يبني قلع..مم..قصدي اطلع بره خلاص أنا هتصرف...

ياترى رئيس تشاد ده عايز إيه..مش فاكر كان مفروض نتكلم في إيه...يلا ماعلينا هسأل ابني...

يابنييي أنا خلصت تعالى شلني...واد يا جيمي تعالى عيزاك في كلمتين...هو النهرده هقابل رئيس التشيك ليه؟

ج:تشاد يا بابا تشاد..

آه تشاد,ليه بقى؟

ج:الراجل بس كان عيزنا نصدرله خبرتنا في مجال البقاء على الكرسي أطول فترة...

ياراجل..إنت جيت في جمل..دي أسهل حاجة...صحيح الولا علوا عامل إيه؟

ج: تمام بس بيجهز المكالمة اللي هيقولها النهرده عشان اللي حصل لينا في تونس..

إيه اللي حصلنا في تونس؟

ج:مش ضربوا الرقاصات اللي كنا بعتنهم عشان يشجعو ملكة جمال مصر في مسابقة ملكات جمال دول شمال افريقيا؟

ياراجل...لا لا لا..كله الا الرقاصات بتوعنا..قول لعلوا يجهز خطبة جامدة..بس يطلعني أنا من الموضوع...

ج:قشطة يا دادي..

بقولك..ناديلي بتاع الخارجية...قولوا يجيب معاه الكلمتين بتوع المؤتمر الصحفي...

إيه يا أبوالغطاغيط,عامل إيه؟

غ:تمام يا ريس..إنت عامل إيه؟ أنا جهزتلك الكلمتين وتمام...بس اللي هتلاقي حروف تخينة كده تقل عليه في الكلام...وحاطيتلاك كام نكتة كده على كام الشة عشان الناس تحبك يا ريس..

وريني كده..ممم...مش هنتهاون في كرامة رقاصات مصر..مم...مرة واحد جزائرى ماشى مع خطيبته بيقولها قوليلى حاجه توقع قلبى .... قالتله حاسب متعب وراك..جامدة دي...قشطة يا غطاغيطو..طير إنت بقى...

واد يا علوا..تعالى عيزاك...باقولك إيه...عيزك تولعها النهرده..واحتمال اخليك تنزل الانتخابات.. فاكس جيمي..

ع: ثانكس دادي..

-------------------------------------------------------------------------------------------------------

يتبع..

Tweet

تسمحيلي..

تسمحيلي بتاني رقصة..

رآها لأول مرة..خطفت قلبه قبل عقله قبل عينه..

تاه في امواج شعرها..غاب في براءة وجهها..ضاع في جمال عينيها...

احس بقلبه يخفق كما لم يخفق من قبل..

احس بأنها المختارة...

قرر استجماع شجاعته..لأول مرة في حياته الممتده لعشرين عاما إلا قليل..

تسمحيلي بتاني فرصة..

اتجه ناحيتها..

ابتعدت خطوة...

تراجع خطوة...

اقتربت خطوتين...

اقترب خطوة...

الشوق بيعلى في كل خطوة ..بنتوه ما ندرى ايه بيجرى..

وقف امامها..احس بلسانه يتحجر...

لم يستطع الكلام..عجز عن النطق...

قالت عيناه كل ماأراد أن يقوله...

قربيني كمان لقلبك ..سمعيني احلى غنوة..

أحس بعينيها تتفاعل مع عينيه..تحاورهما..

لماذا لا يتحدث هذا المغفل...قالت عيناها...

قلبي يحكي عن غرامه ..لو عنيكي يسمحوله ..

خائف..خائف من الفشل...ردت عيناه..

بس خوفي يقولي لسه...

تكلم..ما الحياة إلا فرص..وهذه فرصتك...قالت عيناها..

اشتدت خفقات قلبه..

احس بذروة الشجاعة..

هم بالكلام...لم يجد الكلمات..

اختفى قاموسه اللغوي ..نسي مفردات لغته..

كلام كتير نفسي اقوله ..ومش كفايه الليل بطوله..

أحبك..

قالها..

لم يتمالك نفسه..وجد نفسه يعدو..

يجري إلى المجهول...

اختفت المشاهد من حوله..

استبدلت بمشهد الليل الكئيب..

وهو مازال يجري...

تسمحيلي بـتاني رقصة..

هل سيراها مجددا؟

تسمحيلي بـتاني فرصة...

(الأغنية من فيلم "زي النهاردة" ,"تسمحيلي", أداء هاني عادل)

Tweet

انتماء..

مقتبس من محادثة مع واحدة اعرفها:

"هو إنت بتحس إنك مصري بعد كل ماتش بنكسب فيه بس,صح؟"

الجملة دي,على الرغم من صغرها..فتحت في مخي مواضيع كتيرة..مواضيع زي الإنتماء,تأثير كرة القدم,عدم الإنتماء وخيانة الوطن...

إنت مصري؟ أكيد مادام بتقرا هنا يبقى إنت مصري,بس أنا قصدي إنت فعلا مصري؟ عندي اختبار صغير جدا...لو عرضوا عليك الجنسية الأمريكية,هتوافق ولا لأ؟ بعد متجاوب السؤال ده,أسألك تاني إنت فعلا مصري؟

طيب هو الإنتماء بيتناسب عكسيا مع مرور الزمن؟ يعني اجدادنا وابائنا كان عندهم انتماء أكتر؟ في الموضوع ده أنا عندي قصة صغيرة:

والدي شغال في السعودية,بياخد مرتب معيَّن...في فترة اتعرض عليه ياخد الجنسية السعودية,مقابل إن يرفعوا مرتبه 50% تقريبا...والدي رفض..

هل ده يثبت إن الإنتماء بيقل مع مرور الزمن؟ ولا دي مجرد حالة فردية متعبرش عن جميع الحالات؟

طب هو يعني إيه انتماء؟ وينفع انتمي لأكتر من بلد مثلا؟ طب لو أنا عندي انتماء ل مصر,وهاجرت اشتغلت بره,أبقى باخون بلدي؟وهو انتمائي للوطن العربي يتعارض مع انتمائي لمصر في ظل الظروف اللي موجودة دلوقتي؟

دراسة: ربع العرب يريدون الهجرة من أوطانهم

دراسة: 45 مليار دولار خسائر مصر من هجرة العقول والكفاءات في 50 عاما

هو انتمائي لمصر أصلا صح؟ هو أنا ينفع انتمي لبلد الغلط راكبها من ساسها لراسها؟

هو أنا ينفع انتمي لمصر واهتفلها في ماتش..واشتمها بعديها بكام يوم؟ طب لو أنا ماشجعتيش مصر في ماتش أبقى خاين؟

طب هم الجواسيس معندهمش انتماء؟ولا الظروف هي اللي دفعتهم ل كده؟طب إنت لو عرضوا عليك مليون جنيه مقابل تبقى جاسوس هتوافق؟

طب الجواسيس اللي بيشتغلوا لصالح مصر,دول اعلى ناس في الانتماء؟

كفاية اسئلة كده ووجع دماغ...أما أروح أشتري علم مصر عشان الماتش..

محمد صابر,مهندس,جاسوس نووي لإسرائيل

رفعت الجمال(رأفت الهجان),أشهَر جاسوس مصري

Tweet

AIMAL..Happy Ending..

أنا النهارده حابب أكتب البوست دي,عشان حاجات حسيتها..حاجات عشتها..حاجات اثرت فيَّ...مش أنا بس...ومعايا ناس كتير...عشنا تجربة...خدنا خبرة...اتعرفنا على ناس جديدة...منهم اللي هنفضل معاه علطول..منهم اللي يومين وهننساه...البوست ده أنا هتكلم عن AIMAL..

أنا مش هتكلم عن أي حاجة حصلت في ايام elsessions..أو الكونفرنس..أنا هتكلم عن أشخاص...أشخاص بجد أنا مبسوط إني عرفتهم..وأشخاص نفسي اتعرف عليهم أكتر..وأشخاص أتمنى نبقى صحاب على طول...الترتيب عشوائي..:D

1-رافعيييييييييي:حبيبي...:D من أحسن الشخصيات اللي الإنسان ممكن يتعرف عليها...مش قوي يعني ...وإيه..لبناني لبناني يعني :D

2-طاهر:ذليني بالجزاير :D بأحس إني طفلة الحشرة جنبه :D...بيكتب شعر كمان...

3-صفاء: مش عارف القيلها اسم حركي...عملنا أحلى شغل تونس مع الجزاير :D...

4-قدري: البنك الدولي الإسرائيلي :P...عايزين نشتغل مع بعض في حاجات تانية إن شاء الله..

5-شيماء:زي ماقلتلها...مبسوط قوي إني لحقت عرفتها في الكونفرنس...بجد كنت هبقى خسرت حد محترم قوي...

6-ممدوح: شكلك يدي على مغربي برضه :P..

7- ميزو: عارفك من قبل كده...بس قشطة برضه :D

8- قاسم: اكتشفت الجانب الظريف فيه...:D

9-دعاء: بالرغم إني متعملتش معا شخصيا كتير,بس هي دماغها حلوة قوي ما شاء الله,واتوقعلها مستقبل حلو إن شاء الله..

10-ريم..كاريمان..اكرم: اشتغلنا مع بعض قبل كده..بس عرفتهم أكتر الايام دي...

11-ماجد:أول حد عرفته في AIMAL...نفس الكلية :D..شخصية مريحة...

12-اماني يوسف:تعبت قوي مع موريتانيا ...نفسي تركز شوية :P...

13-أبوصلاح...رفيق الكفاح الجزائري...:D

ناس كتير تانية اذكر منهم:

بانسيه,اماني,لولو,عز,هشام,علا,سلمي,يارا.شيخة,هبة,عامر,هشام...

يارب دايما متجمعين سوا...ونشتغل مع بعض في حاجات تانية إن شاء الله...

Tweet

وهم الحب..

هو:بحبك

هي: وأنا لأ

هي:بحبك

هو:وأنا لأ

)نوبة ضحك مشتركة(

هو:تفتكري لو قلنا ل أهلنا كانوا هيوافقو؟

هي:مش عارفة..أنا بابايا لو عرف كان هيموتني..

هو: باباكي ده صعب قوي

هي:أنا لو ينفع اختار كنت اخترتك تبقى بابايا.

هو: بس كده متجوزيش ليا..

)نوبة ضحك مشتركة ثانية)

(يمسك يدها في حركة خاطفة,فتسحبها بسرعة)

هو:إيه بقى

هي:عيب كده..

هو:خلينا نستمتع بآخر لحظاتنا سوا..

هي:لأ مش كده يعني..

هو:طيب..

(لحظة صمت)

هو:إنتي عارفة إني مقدرش اعيش لحظة من غيرك...اليوم اللي بيعدي ومش بشوفك فيه..بيبقى يوم كئيب..بتخيلك في كل حتة..باسمع الأغاني اللي بتحبيها..بروح الاماكن اللي كنا فيها سوا...بمسك الموبيل أشوف المسج بتاعتك..

(يتورد خداها)

هي:بس بقى بتكسف..وبعدين إنت برده عارف إني بحبك..وإني بتحدى تقاليد المجتمع وبتحدى عيلتي عشان أبقى معاك...

هو:ليه الدنيا ظالمة كده؟ ولا الحب هو اللي ظالم؟ ولا احنا اللي ظالمين نفسنا؟

هي:احنا بس في زمان ومكان غلط...

هو:تفتكري؟

هي:أيوه أكيد..عشان كده احنا بنعمل اللي هنعمله دلوقتي...

هو:تفتكري ده صح؟

(اصوات صريخ تأتي من بعيد)

هي:هو ده الحل الوحيد إن نبقى مع بعض ...

هو:طب ممكن امسك إيدك ؟

هي:ماشي..

(أصوات بكاء..)

هو:غمضي عينك وأنا هغمضها...

هي: غمضت أهو..

)يطبع قبلة على خدها)

هي:إيه ده متفقناش على كده..

هو:معلش كان نفسي بس في كده..

هي:خلاص ماشي...يلا بقى..

هو:يلا...

(نرى المشهد من اعلى...تجمهر في الشارع..وسيارات إسعاف)

(يقفز الشاب والفتاه من اعلى برج القاهرة ممسكين بأيدي بعضهم البعض)

(صوت بكاء وصراخ يزداد شيئا فشيئا...صوت ارتطام)