وحدة

Yara Gad Tweet

شارع أبونا هوا

-اكتشفت إن احنا البلد الوحيدة اللي فالعالم..اللي لو عايز تدخل يمين, هتستنى زيك زي الناس اللي ماشية طوالي..يعني معروف في العالم كله إن الحارة اليمين عند الإشارة مفروض تسيبها فاضية عشان الناس اللي داخلة يمين..ده في العالم..عندنا بقى فيمصر حبيبتنا..مفيش حارة يمين ولا حارة في النص ولا أي حاجة..داخل يمين تستنى يا كلب زيك زي اللي ماشي علطول..اشمعنا يعني إنت توصل بدري...

- حاجة برضه لاحظتها في الشارع المصري..ألا وهي عدم الإلتزام بالحارات..أعتقد يعني إنه معروف في العالم كله ..أو من باب الذوق والاحترام إنك لما تكون ماشي فيحارة متنقلش ل حارة تانية إلا لسبب معين …ده في العالم...عندنا بقى فيمصر حبيبتنا..مفيش الكلام ده..الشارع شارعنا..والحارة حارتنا..وأنا وإنت واحد..ويابخت من وفق عربيتين في الحلال...المهم برضه إن الموضوع ده ليه سبب تاني..وهو الغيرة..أيوه يا جماعة..السواقين بيغيروا من بعض..تلاقي السواق ماشي فيحارة..يلاقي الحارة التانية سلكت..يقوم حالف بالطلاق إنه هيوصل قبل الناس اللي في الحارة التانية..اشمعنا يعني..أرجل مني ولا إيه...

-الموبيلات..كل الناس بقى معاها موبيل..حتى الراجل بتاع الخضار اللي فأول الشارع..معاه موبيل..أنا فاكر أيام لما الجبل وقع عالناس في الدويقه..كانوا بيقولوا إن في ناس بيتكلموا من تحت الأنقاض وكده...وقريت ساعتها على موقع اجنبي تعليقات من ناس اجانب...بيستغربوا إزاي الناس دي فقرا كده وكلهم معاهم موبيلات..

بصراحة أنا مش عارف هو الموضوع ده نعمة ولا نقمة..بس دي حاجة واقعية ولازم نتأقلم معاها..

-كليتنا كلية عظيمة..نص دفعة اعدادي شايلة حقوق الإنسان..قولي ليه..اقولك يا سيدي...الدكتور فمحاضرة من المحاضرات قالهم يا ولادي يا حبايبي أنا هحط الإمتحان 3 اسئلة..جاوبوا سؤالين بس..عارفين اللي هيذاكر زيادة ويحل الاسئلة كلها هأعمل فيه إيه؟ إيه يا دكتور؟..هسقطه..ليه يا دكتور..هو كده..أنا مش عايز اتعب وانا بصحح..اصحح التلاتة وأفكر أشوف أنهي اعلى وأخده..مش عايز الكلام ده أنا..أنا مشغول..مشغول ***..

ربنا يعينا..

-اخيراااااا نجحنا في حاجة..طول عمرنا كنا بندعو إن يحصل تلاحم بين عنصري الأمة..وخطب ونداءات وشعارات واجتهادات ومحاولات وتليفونات واستفتاءات وكل حاجة..اخيرا حققنا المستحيل..حققنا التلاحم بين عنصري الأمة..المشاه والعربيات...آه واللهِ..حققنا التلاحم..بص يا سيدي..انزل أي شارع كده..واتفرج..اتفرج عالبشر اللي ماشيين..غالبا لو إنت ماشي عالرصيف هتتضطر تبص جنبك عشان تشوفهم..بيبقوا ماشيين فينص الشارع..فنصه بظبط..اديله كلاكسات اديله شتايم انزل اضربه..ملهوش دعوة..شارع أبويا وأنا حر فيه..

-"ماشربتش من نيلهم؟" العبقري عمر طاهر

Tweet

مواقف

- كنت راكب النهرده في المشروع..رايح الكلية..المهم بعد اشارة كليوباترا بشوية..العسكري وقف السكة كده عشان يعدي راجل عجوز...الموقف ده خلاني أفكر في الموضوع..فـتوصلت لنتيجة..إن دي حركة عظيمة من العسكري إنه يعمل كده...بس للاسف..الحاجة دي مفروض تحصل طبيعي..مفروض إنت كشخص محترم لو شفت حد عجوز أو ست و معاها ابنها أو أي حاجة..تقف بعربيتك أو تهدي عشان يعدوا..إنما احنا فزمن الوحوش خلاص..الحاجات دي بقت كماليات..

-----------------------------------------------------------------------------------------------------------

- بكره الشحاتة والشحاتين..ليا اسبابي:

1- ليه الشحاتين بيبقى ليهم فئة مستهدفة؟ يعني بتوع الحكومة ويقولك نستهدف الشباب ماشي..بتوع اسرائيل ويقولك نستهدف الفلسطينيين ماشي..وبتوع البتاع إياه ونستهدف المعارضة ماشي..إنما ليه الشحاتين مثلا..يستهدفو: أي ولد وبنت مع بعض(ربنا يخليهالك)..أي واحد شكله طالب(ربنا ينجحك يابني)..أي واحدة ست مع ولادها(ربنا يخليهملك)..

أنا مؤمن بحاجة..إن كل حد بيبذل مجهود بياخد نتيجة مجهوده..فـليه أنا كشخص اشتغلت وتعبت وجبت فلوس...أدي الفلوس دي لشخص متعبش ومعملش أي حاجة غير مجرد إنه جالي وطلبها مني؟

مؤمن كمان إن إنت مينفعش تسأل حد حاجة غير لما إنت تكون فعلا متقدرش توفرها لنفسك..

مؤمن كمان إن بلدنا انتشرت فيها الشغلانة المعالة (بضم الميم وفتح العين)..بمعنى الشغلانه اللي إنت مبتعملش حاجة فيها فعليا وبتاخد فلوس:

أ-الشحاتين

ب-المناديين: أنا ليه اخد فلوس لمجرد إني بقف فمكان ومبعملش حاجة؟ ولو مرضتش تديله يبقى متضايق اكن ده حق ليه وواجب عليك

ج-البوابين: ده ممكن يكون معال جزئيا..بس الفكرة هنا إن البواب دلوقتي بياخد أكتر من الدكتور;عندنا العمارة 13 دور..كل دور شقتين..كل شقة عندها عالاقل عربية..كل عربية بياخد عليها 20-40 جنيه في الشهر..ده غير فلوس التوصيل والمرتب والحلاوة والاعياد وخلافه..و احسبها انت بقى..

د-النصابين: واذكر هنا على سبيل المثال ,دكتور عندنا في الكلية بدون ذكر اسماء أو مواد..نزل كتاب..وقال لازم تشتروه..اشترينا الكتاب...قام منزل مذاكرة وقالك ادفعوا 2 جنيه ونص..دفعنا 2 جنيه ونص وحجزنا بالاسم ..استلمنا المذكرة..لقيناها 10 ورقات..قلنا ماشي يمكن بيصور من حتة غالية..قالنا المذكرة لازم تتسلم..آخر ورقة فيها اسئلة جاوبها وسلمها..طب في ناس مكنتش اشتريتها ينفع تصورها من صحابها..لأ..آخر صفحة بالذات عليها ختم..أُمّال يكسب إزاي؟ لازم تصورها تبعه(بـ2 جنيه ونص وهي تتكلف 80 قرش)..

ه- بتوع السينما(usher):

الراجل ده موظف زيه زيك وبياخد مرتب..ليه اديله فلوس كمان..وليه الفلوس دي بتناسب مع عدد الناس اللي داخله؟

2-بأحس إن فيه شحاتين بالصدفة..تلاقي واحدة ماشية في الشارع مثلا وبتشتري حاجة أو لابسة لبس كويس..وفجأة تلقيها جايلك تقولك حاجة لله..أو تلاقي واحدة ماشية في الشارع وتلاقي عربية نضيفة ولا حاجة ويجي فيدماغها إنها تشحت.

3-في النقطة دي هصنف المنادي على إنه شحات:

شحات ومشارط...يعني تديله نص جنيه ولا حاجة يقولك لأ مينفعش يا بيه..أو يبصلك بَصة قذرة من اياهم..

هي البلد مش هتتصلح غير لما كل واحد يحس إنه مش هيكسب غير أما يتعب..ده يشمل إنك مش هتطلع رخصة مثلا غير لما تتعلم السواقة...مش هتنجح غير أما تذكر..مش هتنجح فإنتخابات غير أما الناس تبقى عيزاك...

---------------------------------------------------------------------------------------------------------------

والحلو اقوله يا حلو فعيونه...

------------------------------------------------------------------------------------------------------------

حاجة مرتبطة بالبوست ده..مجموعة بوستات كان عَمرو عبيد كاتبها بعنوان.."حتى يغيروا ما بأنفسهم"

اتفق معاه تماما...والكلام ده برضه يجرنا لموضوع تاني..ليه دايما بتبقى غلطة حد تاني؟ أو بمعنى أدق..ليه دايما الحاجة اللي أي حد تاني بيعملها تبقى غلط أو تنطوي على مؤامرة أو غيره؟ ليه منكنش احنا الغلط..ليه ميكونش هما مش عملين مؤامرة واحنا اللي عقلنا المريض صورلنا كده..ليه دايما عمرها مابتكون غلطتنا؟؟؟

حتى يغيروا ما بأنفسهم 1

حتى يغيروا ما بأنفسهم 2

---------------------------------------------------------------------------------------------------------

خليك ايجابي..be positive

Tweet