برنامجي الإنتخابي لمنصب مندوب الدفعة

أحب أقول للاخوة والاخوات..شكس(المرشح التاني) ممكن يكون الافضل..ممكن يكون الاكثر خلقا..ممكن يكون الاكثر علما
لكن
نحن نختلف..ليه لازم الافضل هو اللي يمسك؟ ليه لازم الاكثر احتراما..ليه منعملش دماغ مندوب؟
أنا وبلا فخر..اسعى إلى التغيير
change
زي ماأوباما بقى أول رئيس اسود..أنا هبقى أول مندوب فاشل
يا جماعة هاهشتكم
برنامجي الإنتخابي:
1-مفيش تسليمات
2-مفيش بروجكتس..ولو فيه هتبقى بروجكتس "تعليمية"
3-هسعي لتغيير اللايحة بحيث يبقى في بين كل امتحان وامتحان 3 اسابيع عالاقل
4-هنسعى بكل جهد إن احنا نحط شاشة عرض دايمه في الفصل نعرض فيها الماتشات المهمة الجاية ل منتخب مصر..انجلترا-ارجنتين-خلافه
5-مفيش نائب مندوب..في حالة غياب المندوب هيمسك رئيس مجلس الشعب..قصدي هنعمل انتخابات تانية في نفس اليوم
6-هنسعى ل تطبيق مطلب دكتور مجدي اللي طلبه مننا السنة اللي فاتت..ألا وهو..تحقيق الإختلاط الكامل والمتكامل..بين عنصري الأمة..قصدي الدفعة
7-البريك هيبقى نص ساعة بأمر الله
8-وتحقيقا لمبدأ إن الشعب مصدر السلطات..ممكن في أي وقت تقديم طلب بسحب الثقة من المندوب..واجراء انتخابات لحظية لمندوب جديد
وبكده أكون وضحت برنامجي الإنتخابي..وأهم حاجة بنبه عليها..هي
change
والله الموفق

Tweet

عشان كده مبحبش اقعد في الكرسي القلاب

للعلم العنوان ملوش أي علاقة بمحتويات البوست..بس الكلمة دي سمعتها من أحمد شاذلي وعلقت فدماغي واصريت إني أحطها في حاجة..

--------------------------

يا حبيبي ده اللي يخاف من العو يطلعله..ينزلوا..

أنا مش خرنج..أنا كينج كونج..مين دول اللي على الفايسبوك..

شربت حجرين عالشيشة..مع توتو والسبع وويشة..شفت ديك كان شايل فيل..وشفت نملة ديلها طويل..

طيب..أنا مش عارف أبدأ إزاي..أنا هبدأ بطرح وجهتين نظر..طبعا الموضوع اللي هكلم فيه واضح وصريح..وهو الأغاني الشعبية...

وجهة نظر 1

ياعمي..إنت بتتكلم في إيه..عادي دي اسمها أغاني شعبي (بكسر الشين)..كل زمان وليه الشعبي(بكسر الشين) بتاعه..زمان كان السح الدح امبو..ادي الواد لابوه..دلوقتي مع التطور الواد كبر وبقى يشرب حجرين وبتاع..فـطبيعي..عيش التطور الطبيعي للاغاني الشعبي (بكسر الشين).. واوعى تخاف من العو..لا يطلعلك ولا حاجة..

وجهة نظر 2

هبوط اخلاقي ذوقي نفسي انحلالي..وانعكاس لحالة مجتمعية هابطة من الاصل..ناهيك(حلوة ناهيك دي) عن إن ده انعكاس أصلا لبيئة فنية هابطة..من أفلام ومسلسلات وخلافه..الناس اللي زي دول لازم يجيبوهم في ميدان عام ويجردوهم من ملابسهم..عشان يحسوا احساس المودلز بتوعهم..

من نظرة موضوعية بقى للموقف..لو بصينا في أي حتة في العالم..هنلاقي في فعلا أغاني شعبي(بفتح الشين بقى)..وليها جمهورها عادي جدا..يعني زمان واحد قال لي..امينيم عندهم زي شعبولا عندنا..وامينيم مشهور فحط يعني...المشكلة لما يبقى قدامك ياما تسمع شعبي..ياما تسمع بوس الواوا أح..أو تسمع أنا دانا..أنا دندن..فتح عينك.. تاكل ملبن..وخلافه من الأغاني العظيمة الرائعة المائعة الواعدة..

فعلا في مشكلة..في مشكلة انحطاط في الذوق..شاملة جميع الطبقات..يعني الأغاني دي ماشي يسمعها الطبقة الضايعة والطبقة المتوسطة..إنما الطبقة الغنية كمان..تبقى دي المصيبة..تلاقي البنت من دول..

-هاي إزيك يا هيدي عملة إيه..أنا سمعت سونج النهارده واو آخر 18 حاجة

-ام فاين..إيه ده بجد..بتاعت مين دي..أكيد أكيد أفريل..ولا يمكن حد من الميتال دول اللي بتحيبيهم..أنا مليش في الكلام ده..بيجيبلي هيدايك

-لأ مش هتصدقي..دي سونج جامدة طحن..عارفة السونجس بتاعت الناس الوحشين دول اللي هدومهم مش مكوية كويس ومش بيغسلوا وشهم الصبح؟

-اللي بنسمعها في الستريت دي؟

-أيوه بظبط..أنا جبت بقى سونج ل واحد اسمه دياب..واد كيوت كده..عامل سونج اسمها العو

-إيه ده طب سمعيني

وهكذا..تلاقي الطبقة دي منبهرة انبهار عجيب بالأغاني دي..بس قدام الناس..إيه الأغاني الهابطة دي..قناع التحضر...

طيب إيه الحل..مفيش حل..للأسف..الموضوع بره ايدين الشعب والحكومة والمجتمع ورجال الاعمال..الموضوع عائد ل ضمير المنتجين والمغنيين والملحنين..ياإما ينهضوا بالذوق العام..أو يجيبوا الذوق العام الأرض..

وكما قال أحمد عصمت

things r going down man faster than need for speed.

وفي الآخر أحب أقول:أنا مش خرنج ..أنا كينج كونج..أنا وأنا رابط إيدي..بلعب بينج بونج!

Tweet

يحدث للاخرين فقط

المشهد: أسرة مكونة من 5 أفراد,اب,أم,ابنة شابة,ابن شاب,طفلة
التلفاز مفتوح على نشرة الأخبار
----
والآن مع نشرة الأخبار

والخبر الاول:مقتل 5 أفراد من أسرة واحدة في حادث انهيار عمارة من 3 طوابق
-----------------------------------------------
ماما ماما..هو إيه الشرخ اللي في العمارة ده؟
لأ يا بنتي مفيش حاجة ده بس عايز يتبيض
----------------------------------------------------
الخبر الثاني: سقوط 10 ضحايا بين قتيل وجريح في حادث تصادم 4 سيارات على طريق القاهرة الاسكندرية الصحراوي
-----------------------------------------------
الإبن:يلا يا ماما أنا رايح مارينا بقى مع صحابي مش عايزة حاجة
الأم:هتروحوا إزاي
الإبن:هنروح في عربية واحد صاحبنا
الأم:طب خدوا بالكم بقى
----------------------------------------------------
الخبر الثالث:اصابة 15 فرد من فصل واحد بانفلونزا الخنازير
-----------------------------------------------
الطفلة:ماما ماما يلا عشان توصليني المدرسة
الأم:يلا بينا
الطفلة:مش هاخد كمامة ولا لأ
الأم:لأ ملهاش لازمة..إن شاء الله مش هيحصل حاجة
----------------------------------------------------
الخبر الرابع:انتحار طالبة بعد رسوبها في اختبار ثانوية عامة
----------------------------------------------
الأب:أنا قلقان على بنتك,قافلة على نفسها من بعد ماالإمتحان خلص
الأم:لأ متقلقش دي بتتكلم في التليفون بس..وبعدين بنتنا عاقلة مش زي الناس دول..الحاجات دي بتحصل للناس التانيين بس
الاب:طب يلا نشوفها كده
(صوت فتح باب)
الأم:لاااااااااااء بنتييييييييييي
الأب:كلموا الإسعاف حالا
(صوت تليفون)
الأب:أيوه
الصوت:حضرتك والد علي؟
الأب:أيوه أنا
طب ابنك عمل حادثة وحجزينه في المستشفى

الطفلة:إيه يا ماما ده العمارة بتتهز..أنا خايفة
الأم:إيه ده دي العمارة بتقع..إيه المصايب دي كلها

(صوت صراخ وتدفق ناس على سِلّم العمارة)

-------------------------------------------------------------------------

Tweet

المكيافيلليون الجدد...... كتابا قرأته

يظن القارئ للعنوان اني سأتكلم عن كتاب جديد اسمه "المكيافيلليون الجدد" قرأته وسأتناول اجزائه بالشرح والنقد والنصح.
حقيقةً لا يوجد كتاب اسمه "المكيافيلليون الجدد" -علي حد علمي- وهذا يقودنا بطبيعة الحال اني لم اقرأ الكتاب إذن من هم "المكيافيلليون الجدد" وما هو الكتاب الذي دفعني للكتابة تابع معي حتي تعلم.

منذ مدة ليست بالطويلة كنت اتجول داخل الكمبيوتر متصفحا ما يقع تحت يداي و لا اذكر التفاصيل صراحة ولكن ما انتهت إليه الامور اني فتحت كتاب "الامير" للإيطالي نيكولا مكيافيللي لمن لا يعرف من هو مكيافيللي هو صاحب المقولة الشهيرة "الغاية تبرر الوسيلة" ولمن لا يعرف كتاب "الامير" هو كتاب ألفه صاحبه مستندا لمجموعة من المبادئ التي يراها هو مناسبة لحكم الشعوب وكان هدف الكتاب ان يكون مرجع للامير الايطالي في الحكم إذ كان اقصي ما يتمناه مكيافيللي ان يقرأ الامير كتابه ويعمل به ليقود الامة الايطالية نحو مجدها القديم.

عند تصفح الكتاب تجد ان الكتاب يركز علي علاقة الحاكم بالرعية وهذا ما يثير الدهشة فالمتوقع من كاتب يريد الاصلاح لامة ان يقدم برنامجا سياسيا واجتماعيا وثقافيا ووو ليكون بديل عن البرنامج الحالي حتي يعم الاصلاح كل مرافق الدولة. ولكن الكتاب يبدأ بتصنيف الممالك وكيفية التعامل معها وينتهي بالتعامل مع الرعية وعامة الشعب علي اسس ومبادئ وضعها مكيافيللي رأها مناسبة. مما استدعاني لاعادة النظر في هدف الكتاب الجوهري نعم الكتاب يهدف لإعادة مجد ايطاليا ولكنه علي غير عادة كتب الاصلاح لا يقدم برنامج شامل.


عند الخروج من الدائرة والنظر إليها من الخارج نجد ان مكيافيللي لم يكن يريد ان يقدم برنامج مصلح للبلاد بل كان هدفه صقل شخصية الامير من خلال تلك الجوانب التي تناولها في كتابه فهو يهدف لصقل الذات عند الامير من خلال تعليمه كيف يتعامل مع شعبه والممالك المحيطة.
كمثال علي ذلك نأخذ شخصية اتبعت التعاليم المكيافيللية وهو ادولف هتلر كان من قراء ذاك الكتاب وبالفعل لعب ذلك الكتاب نصيب في صقل شخصية هتلر حيث نجد ان مكيافيللي في كتابه لا يري حرجا في قتل الابرياء حتي ولو كان السبب هو المحافظة علي المنصب او اي سبب اخر نجد ان بالفعل هتلر قد صقلت شخصيته في تلك الناحية فنجد قيامه بما يسمي بالموت الرحيم والتعقيم الاجباري بدعوي المحافظة علي الجنس الاري (الجنس الالماني) وانه صنف الناس لمراتب جعل اعلاها الجنس الالماني وادناها الجنس السامي وقس علي ذلك.

ولكن ذاك الاعتقاد بأن الكتاب يهدف لصقل شخصية الامير يمكن دحضه حيث ان عند استخلاص الافكار من الكتاب ستجد ان تلك الافكار هدامة من الدرجة الاولي وتتنافي مع اي فطرة ادمية تنبذ القتل والنفاق والكذب والخيانة مما يدفعنا للشك اصلا في قيمة الكتاب وقدرته علي رد المأخذ عليه كما يدفعنا للشك في الاساس الذي ارتكز عليه مكيافيللي بان الغاية تبرر الوسيلة.
الغريب ايضا في الموضوع اننا لم نسمع عمن يسمون انفسهم "بالمكيافللين" لان كما ذكرت ان الكتاب حقاً مليء بالنواقص والافكار السيئة التي لا يعترف بها اي ذو عقل لذا يأتي السؤال هل مكيافيللي هذا مجنون او شخص سيء الخلق اراد ان يؤلف كتاباُ وانتهي علي ذلك. ام ان مكيافيللي ذاك السياسي المخضرم يري شيئا لا نراه نحن ومن أين استمد مكيافيللي القوة في اقناع القارئ بأفكاره.

اعتمد مكيافيللي في كتابه للاقناع علي أن كل شخص شرير كان او خيًر داخله ما يسمي بالشخصية المكيافيللية تلك الشخصية التي تريد اشباع الغرائز البشرية بنهم بغض النظر عن الوسائل او النتائج لذا هو تعمد اثارت تلك الشخصية عن طريق ابراز الغاية وأخفاء الوسيلة لها.

لذا نري من هم قد استفحلت شخصياتهم المكيافيللية في حياتهم تري عندهم "الغاية تبرر الوسيلة"
فنري الموظف المرتشي الذي يبطل حقا ويحق باطلا من اجل ما يسميه لقمة العيش.
ونري المواطن السلبي الذي لا حيلة له في تصريف اموره بدعوي انه عنده عيال.
ونري الشاب التافه الذي كل همه في الحياة "الالبوم الجديد" بحجه ان ذلك فن يهذب نفسه به!
ونري الانسان الذي يتعصب في مباريات الكرة لدرجة قد تصل للقتل بدعوي الوطنية.
ونري الاعلامي الذي يلعب علي اعصاب الناس من اجل ان يزداد نجمه علوا بدون اهتمام حقيقي بمشاكلهم.
ونري الوزير الذي يبذل الغالي والرخيص في سبيل الكرسي.
ونري النائب الذي يسب الدين من اجل حزبه.
ونري المرء يقتل اخاه لاجل حفنة جنيهات.
ونري من يقتل في "خلق الله" بحجة قيام دولة إسلامية.
ونري "أناس" يبيعون قضايا شعوب قد نزفت من اجلها دماء ازكت التراب من اجل المنصب.
ونري "أناس" يزيدون علي الناس السابقين علي حساب نفس القضايا من اجل نفوذهم.
ونري ونري ونري ونري................

أولئك .............أولئك هم المكيافلليون الجدد
------------------
Aboelnour

Tweet