"سلمية سلمية"

هي دي أول حاجة قلناها مع أول تصادم مع رجال الأمن فأول مظاهرة طلعت يوم التلات...أول كلمة علموها لنا..تاني حاجة علموها لنا إن احنا نستخدم الخل والبصل عشان نتجاوز اثر القنابل المسيلة للدموع..

زيي زي كل الشباب اللي كان قمة مكافحته قبل التلات إنه بيعد عالنت يشتم في الحكومة ويلعن سلسبيلها ..ومستني الفرصة اللي يقدر فيها ينزل..أول ماسمعت عن مظاهرات تلات الغضب قررت إني أنزل..نزلت لوحدي..رحت فاتجاه المظاهره فسيدي جابر..لقيت بشر كتير جاية..ولقيت أمن مركزي بينزل من العربيات..خفت للحظة..فكرت أرجع..قلت لأ..كملت..دخلت في المظاهره ..قابلت ناس اعرفها اطمنت شوية..شوية الأمن قابلنا..مابدأوش الضرب إلى لما عملونا كماشة..ضرب من قدام وورا..وقنابل مسيلة..طلعت فشارع جنبي وهربت فعمارة لحد ما مشوا..

أنا باكتب كل ده ليه..أكيد دي متجيش ولا حاجة جنب قصص الشهداء اللي ماتوا..أو الناس اللي بتحارب –حرفيا- دلوقتي في ميدان التحرير..أنا باكتب ده عشان اللي جاي..

يوم الجمعة..نزلنا المظاهرات..مفيش ولا عسكري ولا ظابط ولا مخبر ولا أي حاجة..كل مانيجي على مخرج شارع مهم عالبحر..نبقى مستنيين إن نلاقي عربيات الأمن المركزي واقفة..والعساكر بمنظرهم المحبط –بفتح الباء-جاهزين للضرب..بس عمرهم ماطلعوا..رحنا سيدي بشر..قررنا نرجع تاني من أبوقير..هنا بقى تبدأ شهادتي اللي ربنا وحده يشهد على صدقها..وهي نفسها شهادة ناس كتير كانت معايا في المظاهرة..عند قسم المنتزه..كان معانا واحد قرر إنه يكلم أهله في التليفون..فـوقفنا كتير واتأخرنا عالمظاهرة..المظاهرة بعدت خالص..بعدها بشوية لقينا بيقولوا إن القسم بيتحرق..وفعلا كان بيتحرق..بعد ما المظاهرة مشيت..تاني حاجة..عند فيلا مدير الأمن..أول ماقربنا عليها الناس وقفت درع بشري حواليها وكل شوية يقولوا سلمية سلمية لحد ماعدينها..بعدها سمعت إن الفيلا اتحرقت برضه..

بداية من هنا الوضع اختلف.. .دلوقتي كنا أول مانوصل أي قسم أو مكان نلاقيه محروق من قبلها..الكلام ده اتكرر في قسم الرمل وسيدي جابر والابراهيمية...

بطبيعة الحال عشان كان معانا بنات فاكنا بنتأخر فيآخر المظاهرة..وبرضه دي شهادتي وفي ناس كتير كانوا معايا شافهتالكلام ده..فيآخر المظاهرة كان في ناس شكلها عجيب-طبعا أنا مش هحكم بالشكل- شايلين اكياس غامقة مش باين إيه جواها..واحد منهم وقع منه الكيس..كان جواه طوب..أيوه طوب..غير العصيان والأسلحة البيضا اللي كانت معاهم.

طيب بغض النظر عن الكلام ده كله اللي أنا عارف إنه لا هيودي ولا هيجيب ولا هيفرق أصلا..أنا موقفي إيه من اللي بيحصل دلوقتي؟

هحاول اقول الكلام في نقط:

1- الناس اللي شايفة إن كده الريس عداه العيب..آسف..لو أنتم مستعدين تسامحوه على 300 شهيد في 7 أيام..ومش أقل من 100000 شهيد في التلاتين سنة اللي حكم فيهم..أنا مش مستعد.

2- إيه الجديد اللي الريس قاله في الخطاب التاني عن الاولاني؟ لو اتكلمتوا عن إنه قال مش هيترشح تاني..فـهو قال إنه لم يكن ينتوي الترشح أصلا..فـده ميعتبرش حاجة جديدة(على كلامه)..قال إنه هيعدل 76 و77 ,فتحي سرور فساعتها طلع وقال لك فخلال 70 يوم..شكرا..وفين مادة الاشراف القضائي؟ بالنسبة لعضوية مجلسي الشعب والشورى..بفرض إن ده هيحصل..وهيرجعوا العضوية..طيب إيه اللي هيحصل يعني..تمثيل الحزب الوطني بدل ما هو 99% هيبقى 90.5%؟كده تتبسطوا يعني؟ (تحديث : د. مصطفي كامل السيد أستاذ العلوم السياسية في جامعة القاهرة والجامعة الأمريكية أكد أن هذا تلاعب لفظي, النظر في صحة العضوية معناه فقط النظر في عدد الأصوات المعطاة لنائب ما ضد منافسيه, لكن ليس معناه ولا يشمل النظر في قرارات بطلان الانتخابات التي صدرت في بعض الدوائر قبل الانتخابات نفسها)

لو حد عنده رواية للجديد اللي قاله يبقى يقولي.

3- دلوقتي فمصر..في ناس همها الاول والاخير إنها تفضل عايشة..يعني ينزل الصبح من بيتهم..يروح يشتغل..ياخد كام جنيه فآخر اليوم يرجع بيتهم يأكل العيال..وينام ..ويصحى..وهكذا..الكلام ده بينطبق على عدد كبير-أكبر من ماتتوقع- من الشعب المصري..فلاحين وفي الصعيد...عُمال البناء..الناس اللي باليومية..كل الناس دي شايفة إن مبارك أحسن شخص في العالم..وإن الحزب الوطني هو اللي مستتهم ومهنيهم..وزي ماكنت بقول من قبل حتى ما المظاهرات تبدأ..لو حصلت انتخابات شريفة ونزيهة وناصعة البيض دلوقتي حالا..مبارك –أو جمال- هيكسب برضه..إذا الحل مش هيحصل غير بأن الحزب الحاكم مايبقاش هو الحزب الحاكم..الحل مش بتغير حكومة أو محكمة وزير أو غيره..لأنك محتاج تغير ثقافة شعب..أرجو إن تكون النقطة دي وصلت لأنها أهم نقطة في المقال كله.

4- على الرغم من اتفاقنا إن تاني خطاب كان خطاب ذكي جدا..وقدر يكسب تعاطف ناس كتيرة معاه..بس فيه خطوة واحدة من الغباء السياسي إنه معملهاش..خطوة واحدة كان ممكن تقلب ميدان التحرير وتخلي الناس دي تروح..إنه يتخلى عن دفاعه عن حبيب العادلي-مش عارف هو بيعمل كده بحكم العشرة يعني ولا إيه؟-ويقدمه لمحاكمة عن اللي عمله..

5- احنا قدام نظام مستعد يضحي بالاف الشهداء + اقتصاد بلد + تاريخ واثار بلد مقابل بقاؤه في السلطة..افهموا بقى

(أكتر من 300 شهيد في ال7 أيام - الإقتصاد وقع..السياحة اتضربت..البورصة خسرت حوالي 50 مليار دولار في ال 7 أيام دي - معلومات مؤكدة من مدير مخازن الاثار إن في سرقات كبيرة للاثار فمصر في الفترة دي وطلبه من اليونسكو التدخل)

6- موضوع الجزيرة وإنها هدفها ضرب استقرار مصر..أنا موافق يا سيدي يضربوا استقرار مصر..لان ده أصلا مش استقرار..دي بلد مستنية شرارة واحدة وتنفجر..وفعلا زي ماقريت في مقالة إن مفيش أي حكومة أو رئيس أو نظام هيبقى أسوأ من النظام ده..لكن التغيير مطلوب..التغيير هنا مش تغيير حكومة بس زي ماوضحت قبل كده..أنا ضد الناس اللي سمت البرادعي وغيره متسلقين..التغيير مطلوب..برادعي ..أيمن نور..اخوان..المهم يتغير..

المقاله

7- الناس اللي كانت حاطه أمل عالجيش..كلنا شفنا الصورة اللي فيها واحد من المتظاهرين ماسك واحد من الجيش بيواسيه مقدرش يعمل حاجة فـبيعيط..الجيش يا جماعة ليه قيادة..ميقدرش يتحرك إلا بأوامر..فـمتتوقعش مثلا إن الجنود اللي في الشارع هينزلوا المظاهرات مع الناس..الجيش صابر لحد دلوقتي..

8- واضح جدا ان اللي بيحصل في ميدان التحرير دلوقتي و حصل في اسكندرية أول امبارح من حركات الحزب الوطني..أنا مش هقول ان كل اللي نزلوا تأييد لمبارك من البلطجية..بس فعلا نسبة كبيرة جدا منهم من البلطجية أو عمال مصانع رجال أعمال الحزب الوطني..و أنا شفت بعيني مظاهرة عندنا مؤيدة وماشي فيها عربية من العربية اللي كانت ماشية أيام انتخابات مجلس الشعب بالميكروفون بتنادي بعمر مديد للريس.

''جِمَال'' المؤيدين لمبارك وهي تدهس مُصور صحفي

أنا قلت اللي عندي..وطبعا ده رأي شخصي..وكله هيبان يوم الجمعة..

"انه لابد من ضريبة يؤديها الأفراد، وتؤديها الجماعات، وتؤديها الشعوب، فإما أن تؤدى هذه الضريبة للعزة والكرامة والحرية، وإما أن تؤدى للذلة والمهانة والعبودية"

مقالات مهمة