Head first servlets and JSP

" احنا ممكن نفرط فيأي حاجة...أي حاجة...ماعدا البروجكت بتاع ال” OOP

“يا جدعان ماتفكرو يعني..البروجكت ده عليه 15 درجة خدنا منهم بتاع 7 فاكس بقى الباقي.."

"يعم مش الدكتور قال لك ده بروجكت تعليمي...ادينا بنتعلم.."

"وبعدين بقى في الناس دي..أنا إيه اللي جابني القسم ده.."

النهرده 31/12/2009.. آ خر يوم في السنة الكبيسة دي...سنة 2009

سنة عدت..بحلوها ومرها...بافراحها واحزانها...صحاب راحوا ..صحاب جم..ناس ماتت...ناس عاشت...احاسيس اتولدت...احاسيس انتهت...

السنة دي بالنسبالي..من أحسن وأوحش السنين فينفس الوقت...تقولي إزاي...اقولك يا سيدي...

من النحية العلمية والكلية وكده...سنة سيئة جدا بدرجة امتياز...زي مادخلت السنة زي مطلعت منها...

من النحيه المجتمعية...واللهِ سنة مش بطالة..فيها صحاب كتير عرفتهم وأنشطة كتيرة دخلتها...

من النحيه الأسرية...سنة سيئة جدا..كل يوم ببعد عن العيلة أكتر...

من النحيه العاطفية...حدث ولا حرج(جامدة دي)...كانت سنة مليئة بالاحداث...

طبـعا عشان نكون واضحين البوست ده على مستوى شخصي...

المهم إن السنة خلصت...وإن النهرده آخر يوم في السنة...

الطبيعي...الناس بتحتفل في اليوم ده...وبينزلوا ويهيصوا مع بعد...وليلة راس السنة بقى ماقولكوش...أول ماالنور يطفي ياعمي الساعة 12... و عينك ماتشوف إلا النور...اللي مش فاهم هبقى اقوله بعدين..

طيب...إذا قلنا إن أنا لسة موصلتش للمرحلة دي..أنا لسة في المرحلة اللي قبليها...اللي هي ليلة راس السنة...مفروض أنزل اتسكع مع صحابي...نروح كافيه..نروح كارفور..كده يعني...

هو أنا مكدبش عليكم...الكلام ده كان بيحصل فعلا...زمان..أيام الشباب...وياليت الشباب يعود يوما...فـأخبره بما فعلت أسماء(معيدة الماده في القسم عندنا)..

ياه..فين أيام ثانوية عامة...كان يوم الوقفة ويوم راس السنة من الايام المقدسة...تنزل من بيتك الساعة 8.تكون في بيتك الساعة 5 الفجر...مش مهم عملت إيه ولا كنت فين..بس ده السيستم اللي كان ماشي...

الكلام ده كان ماشي لحد ثانوية عامة...كانت أيام زي الفل..

طب إيه موقفي دلوقتي...طيب تعالوا نشوف الوضع كده من بعيد...

النهرده 31 الإمتحانات 16فاضل 16 يوم...تسليم البروجكت يوم 11 تقريبا...في حفلة النهرده في المكتبة بتاعت راس السنة...في حفلة الليلة الكبيرة يوم 6 برده...

أنا حتتكو في الموقف كله..لو إنت مكاني هتعمل إيه النهرده؟

أنا كنت رايح النهرده حفلة المكتبة...بس الصراحة كسلت..وكمان ملقيتش حد رايح...مش عشان تأنيب الضمير ولا حاجة...

المهم أنا بعمل إيه دلوقتي بقى...

أنا بقرا كتاب اسمه

Head first servlets and JSP

طبعا واضح من اسمه إنه مش كتاب لانيس منصور أو باولو كويلهو..

ده كتاب لل بروجكت..

تخيلوا ده اللي بيحصل أيام الكلية..باقعد ليلة راس السنة أذاكر واشتغل في البروجكت...ده أنا معملتهاش في ثانويه عامة...

أنا قبل الكلية كنت متخيل إن الكلية أسهل من ثانوية عامة بكتير...واكتشفت إن أنا كنت حمار...وبأقول لأي حد بيفكر كده..إنت حمار...حاول تعيش كل ثانية فيحياتك ماقبل الجامعية..الا إذا كنت ناوي تطول في الكلية..أو دخلت كلية نظري...

المهم...ادعولي بقى فلي أنا فيه...

وكل بروجكت وأنتم طيبين...أو كما قال الناس:

Happy new year

Tweet

كلمني شكرا

زمان وأنا صغير..كنت معجب قوي بافلام الكارتون...كنت بشوف إن الشخصية اللي في الكرتون دي شخصية هلامية خرافية عبقرية...شوف كده في توم وجيري..تلاقي توم بيقع من عماره 100 دور..بتدوس عليه عربية...بيتحرق...بيتفعص ويتحول ل ورقه...المهم بعد ثانيتين..تلاقيه رجع تاني ولا اكن حاجة حصلت...

كان نفسي أبقى شخصية كرتون..مابينزلوش ولا نقطة دم ولاد الايه...وأنا كنت طفل بوس الواوا بقى وكده...

واللي ساعد في الموضوع ده كمان,,,إن زمان كانوا بيعرضوا أفلام كرتون في السينما..آه واللهِ...كنا نروح السينما في محطة الرمل..ندخل..نتفرج على نص ساعة كاملة توم وجيري..وصباح الانتشاءاللي بنبقى فيه...

الموضوع ده بيبينلنا اهمية الاعلام..والسينما في تكوين شخصية الإنسان وبرضه تأثره واعجابه بيهم...

طب وإيه اللي جاب الموضوع ده في دماغي؟

امبارح وأنا ماشي في النت...خبطت في اعلان عن فيلم عجيب كده...فيلم اسمه كلمني شكرا...قلت يلا مش خسران حاجة اتفرج عالاعلان بتاعه...

ويا ريتني ماتفرجت...كمية من الاسفاف وقلة الادب والاباحة...لدرجة إني مافوجئتش لما شفت اسم خالد يوسف منور الشاشة في آخر الاعلان...

الفيلم قصته حسب ماأنا فهمت بتدور في منطقة شعبية(سلملي عالواقعية)..واحد عايش هناك..وعايز يعمل فكرة مشروع بأي شكل...وعمل مشروع..وبعد كده اتحمق قوي لما لقى إن الماتشات بتتذاع بفلوس...إشارة واضحة ل art

فـقرار إنه هيدخل الخدمة للحارة ببلاش..يعني هيخليهم يتفرجوا عالماتشات ببلاش...

المهم إنه في حاجات في الاعلان مش فاهم إيه علاقتها..وتحس إن الراجل ده على علاقة بكل ست في الفيلم..من بداية غادة عبد الرزق...لحد البنت اللي قالها "اقلعي" بالنص كده...لحد البنت التالتة اللي هقولكم الحوار دار إزاي معاها...

طبعا من الواضح إن الرقابة وافقت عالفيلم ده...طيب..هو مش احنا دولة مسلمة والرقابة دي بطبق التعاليم دي والخطوة الحمرا اللي الناس مش مفروض تعديها؟

لما يحصل حوار بين واحد وواحدة فيفيلم كتالي:

هي:النص التحتاني لأ..النص التحتاني لأ..خليه بعد الدخلة..

هو:اشمعنا النص الفوقاني ينفع يعني

هي:عشان قلبي في النص الفوقاني

هو:طب أنا قلبي في النص التحتاني وخدي بالك بقى أحسن قلبي تيييت

تيت دي بقى اللي الرقابة فالحة فيه...لو جبت أي حمار في دنيا الإنسان قلتله تييت دي تعبر عن إيه..هيقولك إنت شايفني حمار ولا إيه؟

طب الرقابة إيه موقفها من موضوع النص الفوقاني والتحتاني ده؟ملهاش رأي معيَّن يعني؟

طب مش ممكن شيخ من شيوخنا الأجلاء يطلعولنا فتوى في الموضوع ده؟هل يجوز إن القلب يبقى في النص التحتاني؟

طب هل ممكن مثلا مجدي يعقوب يعمل للراجل ده عملية ويطلع قلبه فوق أحسن كده الراجل يتعب..قلبه كل شوية بيتييت بيتييت..ممكن يروح فيها يعني...

إذا كان ده مستوى الحوار اللي في الفيلم..اسيبلكو أنتم بقى تخيل المستوى المرئي في الفيلم..أو مستوى الهدوم...هتحسوا إن احنا دولة على خط الاستواء تقريبا...والجو حر أوي عندنا...أو تقريبا هم بيقللوا التكلفة بتاعت الفيلم فـا موفرين الهدوم..

طبعا كمان كام يوم هيطلع خالد يوسف يقولك حرية التعبير...ياخي إذا كانت دي حرية التعبير فـأنا مش عايزها!

الراجل ده شوه اسم يبوسف شاهين بأفلامه اللي بيسميها واقعية دي..

معلش أنا طولت عليكم...بس بجد الموضوع معصبني جدا...

يعني احنا سبنا كل حاجة في بلاد بره ومسكنا في حرية قلة الادب(حرية التعبير سابقا)...

لنا الله احنا شباب مصر...اللي شاف وماطلش..

نيابة عن شباب مصر بأقول:لا لخالد يوسف...

Tweet

عني

الناس اللي تعرفني كويس..عرفين إن أنا ليَّ شخصيتين..مش شخصيتين يعني منافق..يعني حسب المكان والزمن والناس اللي حواليا بتظهر الشخصية دي

الشخصية الاولى...دي الشخصية اللي واخدة راحتها..يعني هزار نكت الش(يصل لحد القباحة)..الوش ده بيظهر مع صحابي القريبين..قريبين بمعنى بشوفهم كتير..صحاب الكلية..صحاب المكتبة..صحاب المدرسة..وكده

الشخصية التانية...هي الشخصية الخجولة..اللي مش بتاخد عالناس بسرعة...اللي بتتكلم بحسب..أو مش بتتكلم خالص..اللي صعب تحتها قدام جمهور كتير أو تبقى محور كلام أفراد..الشخصية دي بتظهر قدام الناس اللي أول مرة اتعرف عليهم..أو في الشلل الكبيرة اللي غالبا بتتضمن

بنات...أو طبعا وده الاهم في البرسنتاشيونس

في ناس بتعتبر إني شخصية غامضة بسبب الموضوع ده...بس أنا مش شخصية غامضة..أنا شخصية هدية متخدش منها الكلام بسهولة

عامةً أنا مش بحب البابليك سبيكينج بس في مواقف بتجبرك إنك تعمل كده

كانت أول تجربة ليَّ في الموضوع ده على مااتذكر..يعني أول مرة أتكلم قدام ناس..كان في نموذج محاكاة الأمم المتحدة في المكتبة...كانوا بيشرحولنا حاجة هناك وبعدين فجأة قالوا عيزنكم تعملوا برسنتاشيون وتقدموها بعد 15 دقيقة

وقسمونا مجموعات..حظي طلع مع مجموعة كويسة..وكله اتكلم وفضلت أنا آخر واحد اتكلمت كده ,المهم الموضوع عدى على خير مع اني مقدمتش كويس قوي

بعد كده عدت الايام...واطحتيت في الموقف ده تاني..بس المرة دي في الكلية

كان عندي تقديم كده برده فيمجموعات...مش فاكر كان إيه الموضوع بظبط..التقديم ده بذات أنا رتبتله كتير جدا..أو رتبناله كتير جدا..وكنت مجهز كلام كده على كام نكتة..عشان الناس تضحك..وطبعا أول مطلعة كله بخخخخخ...مفيش أي حاجة..يادوبك قلت المعلومات ومشيت

آخر مرة بقى كانت من كام يوم..كان عندنا تقديم في الكلية برده..بس فيمدى أي كلام..فـالصراحة كلنا كنا مكبرين منها...فإتفقت مع الجروب بتعتي إن إتنين بس هيطلعوا..أنا وواحد تاني...وجهزت على كده ورحت يومها الكلية..اذ أفاجأ بالواد مش عايز يطلع..ليه وإزاي...قلتله قشطة مش مشكلة أنا هطلع..بس فهمني الحتة بتعتك بسرعة

المهم فهمت بالعافية..وجاه معاد التقديم

أول مشكلة..اللابتوب بتاعي...اللي هو تقريبا طلع عالمعاش خلاص..مش بيشغل البروجكتور..وأنا كنت حطت فيديو يعني لازم من الجهاز بتاعي..طب إيه نعمل إيه جبنا جهاز تاني ونقلنا عليه الحاجات

المهم بدأت التقديم...كنت متوتر قوي في الأول ..عشان أنا كنت متوقع عدد قليل قوي..لقيت في ناس ياما...والدكتورة كانت موجودة..والمعيد..فـقلت فلة مفيش مشاكل...بس أنا كنت مجهز سطر كده هاقولوا بتريقة على العدد فـمنفعش اقوله

المهم مشي الحال...وجه معاد الفيديو..الفيديو كان جزء من فيلم 2012...الحتة بتاعت الراجل الروسي ده أما شغل العربية بصوته...فـطبعا االامكانيات مابتساعدش فـالصورة مكنتش واضحة ولا الصوت...فـقلت ماعلينا...ودي كانت تاني مشكلة

وطبعا تطبيقا للمثل الشعبي

it never rains but it pours

جة واحد صاحبنا قام سألني في الجزء اللي أنا فهمته في دقايق..يعني ساب البتاعة كلها وسألني في الحتة دي..المهم جاوبت غلط..بس قشطة برده

بس المرة دي بصراحة أكتر مرة حسيت بالثقة..مش عارف ليه..يمكن عشان معظم الناس عارفها..ولا يمكن لسهولة المادة وعدم اهمية التقديم

المهم إني استمتعت

وسبت انطباع كويس على ماأعتقد

Tweet

مصر أم الدنيا

أنا مكنتش حابـب أتكلم في الموضوع ده..عشان أنا بثق إن السياسة لعبة قذرة..وإن عمرنا ماهنبقى فاهمين الجوانب كلها اللي فيها...

بس أنا اتنرفزت جدا من كام خبر وتعليقات وحاجات كده حصلت قريب...

فـأنا في البوست ده هحاول اغطي أسباب الازمة ودوافعها من وجهة نظري المتواضعة طبعا...

هبدأ الموضوع كده بكام خبر مرتبطين بالحملة على مصر ودورها...

مسيرات بغزة ضد جدار مصر

http://www.aljazeera.net/NR/exeres/308CDC10-5B13-49E9-8C69-0F4680CDE6B8.htm

غزة تتجه لمرحلة كارثية بعد الفولاذي

http://www.aljazeera.net/NR/exeres/65D84123-7CF9-4A61-B3EF-E792C7710B7C.htm

حملة أوروبية تدعو إلى مقاطعة البضائع المصرية ردا على الجدار الفولاذي

http://www.shorouknews.com/ContentData.aspx?id=164926

حملة شعبية ضد السفارات المصرية في العالم بعد منع مسيرة الحرية لغزة

http://www.masrawy.com/News/Egypt/Politics/2009/december/25/gaza_egypt.aspx?ref=rss

حملة شعبية ضد السفارات المصرية في العالم بعد منع مسيرة الحرية لغزة

http://www.masrawy.com/News/Egypt/Politics/2009/december/25/gaza_egypt.aspx?ref=rss

بعد كده عايز اوريكم كام كومنت من ال"اخوة" العرب..

1-

رسالة الى المصريين اللذين يطلقون شعارات انهم ملوا من غزة ويقولوا للشعب الفلسطيني اذهبوا الى دول عربية أخرى وأقول لهم: أن الشعب الفلسطيني بغنى عنكم فان الله وحده متكفل بنا.ولكن عتبنا الوحيد هو أن لا تقيموا جدر علينا ، فلماذا لا يقام هذا الجدار بينكم وبين ما يسمى باسرائيل .ثانيا، انتم شعب غلابة ليس بايدكم الا انت تنتصروا في ماطشات الكوووورة ، ويا ريت تنتصروا بيها أخرى. وسلام (لا تحذفوا يا جزيرة أي شيء) فأنا لا أقول الا الوااااااااااقع. 2- المظاهرات والخطب لا تجدي نفعا مع هكذا عملاء يجب على حماس استرجاع رفح (المصريه)لانها جزء من رفح فلسطين وقد قطعت من فلسطين .وهذا هو الحل الامثل ودمتم 3- أعود بالله, هده الحكومة الظالمة لا تألو جهدا في محاصرة غزة, و كأن بينها و بين غزة ثأر. ألا يخشى الله دلك الشيبة, ألا يعلم أنها مجرد أيام و سيلقى الله. أما بالنسبة لأزلام النظام, فتدكروا أن القرآن لم يتحدث عن ظلم فرعون و نهايته المأساوية دون معزل عن وزيره - هامان - و جنودهما. إن موعدهم الصبح, أليس الصبح بقريب 4- الى صاحب التعليق 50 ,, شكرا يخوي يا ابو اكبر بلد عربي اللي انته بتحكي فيه كان زمان وراح لانه اللي عملته مصر (الحكومة المصرية) ما عملته اسرائيييل حتى اسرائيل جدارها اسمنت ومصر جدارها فولاذ والتاريخ يا سيد محمد المصري لن يرحم مملكة مصر العربية في عام 2009 والاجيال القدمة لن تقرأ عن 73 لان 2009 سيغطي على كل شيء وعلا كل حال لا الوم الجزائريين طيب..دلوقتي أنا هحاول الخصلكم وجهة نظري في الموضوع ده... أولا:حق حماية الحدود والأمن القومي: " معظم البلدان لديها شكل من أشكال الرقابة على الحدود لتحديد أو تقييد حركة الأشخاص والحيوانات والنباتات ، والبضائع داخل أو خارج البلاد. بموجب القانون الدولي ، فإن كل بلد بصفة عامة يسمح لها بـتحديد الشروط التي يتعين الوفاء بها من قبل شخص من الناحية القانونية للدخول عبر حدودها من قوانينها الخاصة ، ومنع الأشخاص من عبور حدودها عندما يحدث في هذا انتهاك تلك القوانين." طيب الكلام ده معناه إيه..معناه إن قفل الحدود ده حق شرعي ل مصر..ومن حقها إن هي تقفل المعبر...ومن حقها تبني جدار أو أي حاجة..هتقولي اخوة واخوات وكده...هاقولك ماشي على عنّا وراسنا..بس السؤال هنا..هل كل الاخوة والاخوات مظلومين وغلابة ونيتهم صافية وبيهربوا بديع وأكل بس؟أكيد الإجابة لأ..كل حاجة فيها الكويس والوحش...ده معناه إن ممكن يتهرب سلاح..هتقولي كويس نحارب بيه..هاقولك في قوانين دولية وبرستيج دولي..مينفعش يبقى تهريب السلاح عيني عينك...ممكن يتهرب مخدرات ل مصر.. وزي ماشفنا في التعليق اللي فات...بعض الفلسطينيين بيعتقدوا إن رفح جزء من ارضهم..فـمفيش مانع إن هم ينتشروا فيها... والحاجة التانية...إن اسرائيل عايزة تهجر الفيلسطنين وتنقلهم لسيناء..وتنقل مشكلتهم لمصر...

وطبعا في حاجة اسمها سيادة دولة

مينفعش دولة تبقى حدودها مفتوحة عالبحري مهما حصل...

ثانيا:دور مصر في الوطن العربي ومحاولة تحجيمه

أكيد كلنا كنا متابعين التأثير اللي عملته بعض الدول العربية الشقيقة والصغيرة عشان تبين مصر إنها الأخت الكبيرة المفترية على اخواتها...واللي قررت تتبري منهم...وترميهم للكلاب...شفنا حملة اعلامية...بدأت من فترة طويلة ووصلت للذروة فيحرب إسرائيل على غزة وفي موضوع الجزاير...بخلاف المشاكل اللي بتحصل من وساطة مصر بين الفيلسطنين والإسرائليين..بس أولا وأخيرا محدش يقدر ينكر دور مصر..مش دورها التطوعي..لأ دورها اللي مفروض عليها..واللي هي حطت نفسها فيه من زمان...واللي بتحاول تسرقه منها دول تانية زي قطر مثلا...

وليه دور مصر ده مهم..الحقيقة أنا معنديش فكرة..بس دي حاجة من الحاجات اللي هي تحس الناس اتولدت بيها...يعني الإنسان العربي اتولد إن مصر أم الدنيا والشقيقة الكبرى..

ثالثا: سياسة خلي الطابق مستور:

كلنا كمصريين بلا استثناء..ساخطين عالنظام..وبنشتم فيه 15 مرة في الثانية...بس أول مانسمع الشتيمة دي من حد من بره..نهج ونثور وإزاي وليه..ومصر أم الدنيا..وكده..ودي طبيعة المصري..ميحبش حد ميعرفوش يهينه حتى لو كانت الاهانة حقيقية...عشان كده شفنا اللي حصل أيام ماتش الجزاير..عشان كام واحد اضرب..مع إن كل يوم في 100 واحد بيتدرب ويتعذب ويت*** في مصر ومحدش بيقول حاجة ولا بتطلع مظهرات..

رابعا:الحملات والمظاهرات ضد مصر:

شفنا حملات ومظاهرات ضد مصر والسفارة المصرية في كل الدنيا...بعضها كان الناس عندها حق...وأنا مقدرش أقول إن احنا كل الحاجات مش مقصرين فيها ,في حاجات أكيد احنا مقصرين فيها بس مش بمزاجنا وهقولكم السبب النقطة اللي بعدها...بس أكيد أكيد دي سياسة دولة..وسياسة ليها هدف...وأعتقد إن احنا من أحسن الدول صاحبة السياسة المعتدلة في المنطقة..

خامسا: سياسة حكومة ام سياسة شعب:

النقطة الأخيرة بقى..هأتكلم فيها وامري لله..هل بناء الجدار الفولاذي..وتصدير الغاز...والكويز..وغيره..سياسة حكومة ولا سياسة شعب؟يعني لو إنت سألتني السؤال ده فيامريكا..اقولك آه دي سياسة شعب..لان الحكومة أصلا جاية من الشعب وبخطير الشعب..فـالقرارات اللي بتاخد اغلبها بتعبر عن الشعب..تيجي هنا اقولك آه دي سياسة حكومة..سياسة نخبة..نخبة من الشعب...زي من يومين قريت خبر عن البرنامج النووي بتاعنا..وقريت إن الخبير قال إن موقع الضبعة كويس..بس في وزير مش موافق عشان وعد بعض رجال الاعمال بـإنه يبعلهم الأراضي دي يعملوا عليها مشاريع!!

أنا قصدي للاخوة العرب...بغض النظر عن موضوع الجدار واللي أنا بتفق في مع الحكومة 100%..اعرفه إن اللي بيتعمل ده كله احنا مش موافقين عليه..وإن احنا معاكم بقلبنا..وإن شاء الله التغير جاي ..سنة 2011...

خلاصة الموضوع...مصر من حقها تبني جدار فولاذي أو أي حاجة تؤمن بيها حدودها وتفرض سيطرتها...الشعب المصري غير راضي عن بعض سياسات حكومته...بعض الدول العربية ليها مصالح أكتر مع الاعضاء مننا فـهي بتحاول تغطي على كده بانها تضخم هفاواتنا أكتر...

زي ماقال علاء الأسواني:

الدمقراطية هي الحل

Tweet