تغيير

لما كيلو الطماطم يزيد 1000 % في 4 سنين(من 50 قرش ل5 جنيه) ومرتب الموظف ميزدش أو يزيد حاجات بسيطة فنفس الفترة..اعرف إن بلدك محتاجة تغيير..

لما 1000 موظف يقبضوا 500 ألف جنيه في الشهر وميبقاش عاجبهم..وشيكابالا يقبض 500 ألف لوحده برضه في الشهر وميبقاش عاجبه..اعرف إن بلدك محتاجة تتغير..

لما تبقى بلدك عندها عجز فالحاجات اللي بتصدرها..وفائض فالي بتستورده..اعرف إن بلدك محتاجة تتغير..

لما يزودوا في منهج الدراسات درس عن الحزب الحاكم وتعريف وشرح ليه..ويشيلوا درس التكاثر من الأحياء ..اعرف إن بلدك محتاجة تتغير..

لما يبقى السن الرسمي لشرب السجاير والتحرش الجنسي هو 14 سنة..اعرف إن بلدك محتاجة تتغير..

لما كاميليا شحاتة فإسبوعين تكون مسيحية وبعدين تسلم وبعدين تبقى مسيحية تاني..اعرف إن بلدك محتاجة تتغير..

لما وزير يقولك أنا محدش يقدر يشيلني..ساعتها اتأكد إن بلدك محتاجة تتغير..

Tweet