مؤخرا اكتشفت إن صديقه ليا بتدخن..في اللحظة بظبط اللي عرفت فيها..حسيت بصراع داخلي..صراع مصري أصيل..بين الثقافة والعادة والتقاليد من ناحيه..وبين ادعاء الإنفتاح والمساواة وخلافه من ناحيه تانية..فـالجزء الاولاني كان بيقولي..إزاي بنت تشرب سجاير..دي أكيد بنت مش محترمة..ماهو اللي يشرب سجاير ويأذي نفسه ممكن يعمل أي حاجة تانية..والناحيه التانية كانت بتقولي..ياعم خليك متفتح بقى..ماإنت لما بتشوف راجل بيشرب مش بتقول عليه مش محترم..اشمعنا البنت يعني لما تشرب سجاير تبقى مش محترمة والمجتمع بيحتقرها...
المهم مفيش جانب من الجوانب انتصار..وانتهت المناظرة بالتعادل..
الموضوع ده لفت انتباهي لحاجة مهمة قوي..ألا وهي..إن الشعب المصري..بقى فيه حاجات مزروعة جوه جيناته..حاجات لو عدى 100 جيل هتفضل موجودة فيدماغه..حاجات متوارثة عبر الاجيال..ولا انفتاح ولا انغلاق ولا أي حاجة هتغيرها..وسواء كانت الحاجات دي صح أو غلط بس الناس مؤمنة بيها..وآدي شوية حاجات من الحاجات دي:
1-البنت مينفعش تركب مع الولد في العربية والعكس صحيح: وأنا شايفها حاجة مستفزة جدا جدا..لان البنت مبيبقاش عندها مشاكل إنها تروح معاه كافيه مثلا أو حتى سينما..إنما العربية لأ دي مكان مقدس..ولو ركبت معاه العربية تبقى مش محترمة وإزاي ومش إزاي
2-قشر اللب مكانه الشارع
3-غطيان ازايز البيبسي مكانها الشارع
4-أعقاب السجاير مكانها الشارع
5-الحجاب : ولازم افسر النقطة دي , قصدي بالحجاب..إن في ناس كتير عندها إن أول ماالبنت تدخل ثانوي أو كلية يبقى خلاص الحجاب علطول..فـالبنات دول بيلبسوا الحجاب عن ارغام أو عادة وليس اقتناع..فـعشان كده تلقيهم بقى لابسين نص كم وضيق وخلافه..مما يتنافى مع الهدف الاساسي للحجاب..
6-تدخين البنت جريمة إنما الولد عادي مفيش مشاكل
7-لعب الكرة في البيت ممنوع: زمان وأنا صغير كنت بكرة القانون ده قوي,وكنت بعتبره من القوانين اللي الأهل بيحطوها عشان ينكدوا عالعيال مش أكتر..
8-البنت مينفعش تبدي اعجابها بولد لكن الولد ينفع: ياأما تعتبر البنت مش محترمة ووقحة ومش لاقية
9-الوقفة ليلة للعربدة: وده مبدأ معروف جدا خاصه في المناطق الشعبية وغير الشعبية..وحاجة موجودة من زمان جدا مع الشعب العظيم..إن يوم الوقفة لازم يبقى فيه شرب وحشيش وخلافه مما لذ وطب من مذهبات العقل..
10-معلش: ودي اللي جايبنا ورا..
أكيد في حاجات تانية كتير مجتش فيدماغي, بس المشكلة الحقيقية إيه الحل في الحاجات دي؟ مفيش حل..لانها هتفضل مستمرة ومستمرة ومستمرة مع الاجيال الجاية كلها..
مش كل حاجة ضد التقاليد والعادات القديمة تبقى انفتاح, في تقاليد وعادات مش مفروض تتغير وفي اللي لازم يتغير , أما عن الشعب المصري , هوا مش طول حياته كده , لأ ده كان في عصور انفتاح وانغلاق زي ال sine wave كده واحنا دلوقتي (في رأيي ولو قست على كل الشعب مش الشباب بس ) في عصر انغلاق بس أكيد ده حيتغير مع الوقت زي ال sine wave كده
ReplyDeleteمحمد سامح
انا آسف ان التعليق جاى متأخر شوية , بس انا متابعتش البلوج بتاعك بقالى فترة كبيرة :) .
ReplyDeleteمعلش أنا بختلف معاك فى حاجات كتير فى التدوينة دى :
هو أكيد طبعا عندنا عادات غلط , لكن مش من العادات الغلط اننا نحاول نحافظ على بناتنا و انهم ميعملوش غلطات الرجالة فى المجتمع , و ده عشان هما بيمثلوا عرضنا و شىء كبير فى حياتنا .
يعنى مثلا موضوع السجاير ده , كلنا عارفين انو غلط للراجل و الست و مش معنى ان ست بتشرب سجاير انها مش محترمة و ممكن تعمل أى حاجة لكن فيها شىء من الفساد , زى الراجل اللى بيدخن بالظبط .
و أكيد انتشار الحجاب مش دليل على التدين ولا النقاب ولا اللحية , كلنا بنى آدمين و لينا أخطاءنا , يعنى مش لام نعامل الملتحى على انه شيخ و لو غلط غلطة مهما كانت نعلقله المشنقة , يعنى باختصار المظهر مش كل حاجة لكن وجوده مش شىء وحش و خطأ الملتحى أو المحجبة لا ينقص فى الدين من شىء انما ينقص منه هو أو منها هى.
بالنسبة للبنت اللى تروح الكافيه أو السينما أو العربية كله غلط مش العربية بس :) و كلنا أكيد عارفين ده و اللى بينكر ده بيغالط نفسه .
موضوع ليلة الوقفة ليلة عربدة فأكيد هى ليلة عربدة للمعربدين أصلا , يعنى أتحداك يكون واحد صام رمضان صح و قام الليل و مكنش مقضيها تليفزيون و خيام رماضانية و يروح فى الوقفة يشرب حشيش و بتاع , و كذلك فى العيد الكبير يكون صام فى التسع أيام و كدة .
موضوع ابداء البنت اعجابها بالولد عادى طبعا لو هما بنات فى بعض و كذلك الولد لكن أكيد هيكون غلط لو الطرفين وجها لوجه من غير ميكون فى حاجة رسمى .
أكيد موضوع النظافة ده عندك حق فيه و لازم كل واحد يبدأ بنفسه , و موضوع معلش بردو عندك حق فيه :) .
أكيد الحل موجود و واضح جدا لكن احنا اللى مش بنفذه و هو اننا نلتزم بالدين و نتمسك بيه و ده فيه حل لكل مشاكلنا دنيا و آخرة.
بمناسبة معلش , معلش انى طولت فى التعليق :D
أحمد قطب اللى فى رابعة ان شاء الله مش اللى عندوكو عشان ميحصلش لخبطة :)