ده بوست قديم كان مفروض كتبته أيام الشتا الشديد من كام أسبوع بس نسيت احطه..
--------------------------------------------------------------------------------------------------
اخيرااااااااا الدنيا بتشتي..أنا مش مصدق نفسي..بعد فترة طويلة جدا وقلت خلاص الشتا خلص ..ومش هنشم ريحة المطر تاني..وآدي اللي خدناه من الاحتباس الحراري..بس اتكبست..والدنيا شتت..
بمناسبة المطر ..لو حد فاكر البوست اللي أنا كنت عامله عن نفق سيدي جابر..إنه بيغرق في الشتاء..والاكروبات اللي الناس بـتعملها عشان تعدي..اتكرر الامر المرة دي..مش عارف قصدهم إيه بظبط..تحس إن الحكومة عاملة زي الطالب اللي يدخل امتحان الميدتيرم ويحل سؤال غلط..يدخل الفينال يحل نفس السؤال غلط..يدخل الملحق يحل نفس السؤال الغلط..***.. يعني ده إنت غبي فحط..بس الصراحة بعدها بكام ساعة أما عديت..لقيت المية راحت..شفطوها يمكن أو كده..
بمناسبة سيدي جابر..أنا كنت رايح الكلية فـبركب مواصلات من سيدي جابر..السكة كانت زحمة قوي..بس محستش بالزحمة..مش عارف ليه بالنسبالي الزحمة دايما مرتبطة بالحر....يعني فيوقت الصيف بتحس بالزحمة والخنقة وتبقى عايز تطلع من هدومك..إنما في الشتا حتى لو زحمة مبتحسش بيها..يمكن هي دي life associationsاللي فياض قال عليها..كل واحد فينا بيربط احساس معيَّن بموقف أو مكان أو شخص معيَّن..
بمناسبة الزحمة..هو ليه ازمة السولار والبنزين حصلت؟ طب هو ليه احنا بنصدر الغاز الطبيعي ل اسرائيل وعربياتنا مش لاقية بنزين تمشي بيه؟ طب مش ممكن مثلا من دلوقتي..نوقف التصدير وبفلوس التصدير القديمة نعمل مشروع تحويل العربيات لغاز طبيعي مدعوم من الحكومة؟ مش ده هيوفر مليارات دعم البنزين؟وممكن بدل دعم البنزين ده نصلح الطرق عشان نقلل الحوادث اللي بقت بتحصل كل يوم؟
بمناسبة الطرق..ليه الشوارع عندنا في الشتا بتبوظ؟ حفر وخلافه...مع إن اسكندرية بتبقى رائعة في الشتا..أحلى موسم …وأحلى وقت سواء لوحدك أو مع اللي بتحبه أو مع صحابك...كفاية منظر البحر مع الشتا...
بمناسبة البوست..يارب يكون عجبكم
No comments:
Post a Comment