أنا مستقيل...امشي يا ابن التييت!

كان عندي كلية يوم السبت..ورحت الكلية زي أي إنسان طبيعي...المهم إن كان عندي اليوم ده ل وقت متأخر...روحت..نمت صحيت اليوم اللي بعده...بتصفح الأخبار زي كل يوم الصبح...لقيت كل الجرايد بتتكلم على موضوع واحد...وهو موضوع حادثة القطرين في العياط...حسيت إني سمعت الخبر ده قبل كده..العياط والقطر وحادثة...قلت يمكن دي حالة من حالات الديجافو...قعدت قريت التفاصيل...أول حاجة شدت انتباهي عنوان في جريدة خاصة:"جاموسة تقتل 30 شخص"...افتكرته مقال ساخر أو اصطباحة من اصطباحات بلال فضل ولا حاجة...بدأت اقرا...وبعديها قريت من كذا مصر..المهم اللي استنتجته إن الحادثة حصلت كالتالي:

-قطر ماشي في أمان الله لا بيه ولا عليه...اذ يفاجأ بـجاموسة قدامو عالقضيب..

-القطر معرفش يفرمل..وداس الجاموسة فـوقف...

-سواق القطر بعت رسالة ل برج المراقبة أو أيا كان اسمه..يقول له إنه اتعطل عشان يوقف القطرة اللي جاية..

-الراجل المراقب...مشى قبل ورديته..قبل مايسلم المرابة للي بعده..ومن سخرية القدر إنه كان في القطر ومات...

-كان في قطر تاني جاي في نفس السكة وطبعا معرفش إن في قطر متعطل...

-القطرين خبطوا في بعد..وحصل اللي حصل..

واحد يقولي ده خطأ بشري 100 في ال100..أنا معاك ده خطأ بشري..

المهم بعديها بيوم...سمعنا عن جلسة عصروا فيها الوزير-نواب مجلس الشعب-ل درجة واحد قالوا ياريت نهتم بالسكة الحديد زي اهتمامنا بـشفروليت...اليوم اللي بعده سمعنا إن الوزير اجتمع مع أحمد نظيف...وبعديها طلع اعلان مسئوليته 'السياسية' عن الحديث وقدم استقالته والريس وافق عليها...(أنا لحد دلوقتي معرفش يعني إيه مسئوليته السياسية لو حد يعرف يقولي)...

ده ملخص الاحداث اللي حصلت في الحادثة دي...ومن نظرة مبدئيا الناس هتقول ده خطأ بشري..ليه الوزير يستقيل؟..طيب...هو ليه الموظف ساب مركزه قبل معاده؟برده هتقولي ده يرجع ل ضمير الموظف..ماشي..إيه اللي جاب الجاموسة عالقضيب...هتقولي واحد فلاح مجنون...ماشي...

تفتكر لو مفيش فساد اداري وتهرب من الكبير للصغير كان الموظف هيسيب مكانه قبل المعاد؟تفتكر لو هو ماكانش شايف البلد حوليه كل الناس مبتعملش اللي عليها صح كان هو عمل كده؟لو شايف رقابة كويسة عليه(حتى لو الوازع الأخلاقي مش موجود عنده)كان هيعمل كده؟

المهم احنا مش مهمتنا نحدد مين الغلطان دلوقتي...المصيبة حصلت والنيابة بتحقق..والله يرحمهم شهداء القطر..

أنا عملت البوست ده ل سبب واحد...وقع كلمة استقالة دي كان غريب عليَّ قوي...بقالي كتير مسمعتوش...فـحبيت أعمل تتبع ل حالتين إستقالة حصلت قريب أو كان مفروض تحصل فيمصر...

1-قطر الصعيد (قطر الموت)فبراير 2002:

رئيس الوزراء:عاطف عبيد.

وزير النقل والطيران: د.ابراهيم الدميري

تخيل شخص في مكان...المكان ده بيتحرق...أيوه بيتحرق..المكان ده مقفول..والنار بتقرب منه..بتقرب...بتقرب...مع أول لمسة للنار ل جسمه..بيتلسع...بعد كده النار بتخش على جسمه كله...الألم بييجي بعد فترة..لحد ماالنار بتشوي الجلد ولحم كله..ده بظبط اللي حصل سنة 2002, قطر...ماشي فيأمان الله...14 عربية..7 ولعوا..والسواق فصل ال7 الباقيين..السبب إن شوية بياعين كانوا مشغلين اسطوانات الغاز..وسيلة الهرب:نط من شباك القطر...وإنت وحظك..في ناس وقعت في الترعة وماتوا بالمية بدل النار...

المحصلة:حوالي 350 قتيل.

اقالة وزير النقل والطيران...وفصل وزارة النقل عن الطيران..

جرايد:

سائق القطار لم يتنبه إلى الحريق وظل يقوده لثمانية كيلومترات والنيران تشتعل في عرباته في حين كان الركاب يقفزون من النوافذ والأبواب
ـــــــــــــــــــــــ
فرق الإنقاذ تعثر على عشرات الجثث المتفحمة داخل القطار وفي الأراضي الزراعية المجاورة وجماجم القتلى انفجرت من شدة النيران
ـــــــــــــــــــــــ
الناجون يقولون إنهم ساعدوا بعضهم في القفز من القطار ومنعت القضبان الحديدية على النوافذ آخرين من الهروب حتى تفحمت جثثهم
ـــــــــــــــــــــــ

2-حريق مسرح بني سويف,سبتمبر2005:

رئيس الوزراء:أحمد نظيف

وزير الثقافة:فاروق حسني

تخيل برده شخص فيمكان مقفول..بيتفرج على عرض مسرحي جميل..بيضحك..بيحزن..بيتفاعل مع العرض...فجأة يلاقي النار حواليه فيكل مكان...مفيش مخرج طوارئ..مفيش طفايات حريق...الحل إن كله يجري نحية المخرج ياما يتشوي..يجري نحية المخرج...يلاقي الباب مقفول من بره...

ده اللي حصل فيبني سويف..

المحصلة:حوالي 50 قتيل..منهم:- أستاذ الدراما في المعهد العالمي للمسرح التابع لأكاديمية الفنون والممثل والمخرج محسن مصيلحي

-أستاذ النقد في أكاديمية الفنون حازم شحادة وزميله الناقد والأستاذ في نفس المعهد مدحت أبو بكر

تقديم فاروق حسني ل استقالته...بس الريس رفضها..

جرايد:

-قال المخرج ناصر عبد المنعم إن هذه الكارثة ستعاني منها الحركة المسرحية في مصر لمدة طويلة، ليس فقط بسبب فداحة هذا الفقد بل أيضا لحسرة فقدان رفاق مسيرة وأساتذة متميزين يعملون على إعداد جيل جديد يرفد الحركة المسرحية المصرية والعربية, على حد قوله.

كلمة اخيرا: لك الله يا مصر...

Tweet