يمكن

صوت فدماغك بيقولك:

بحبها..

مشتاقلها..

محتاجها..

-------------------------------

ليه..سؤال بتسأله لنفسك مية مرة من ساعة اللي حصل..

قاعد عالسرير..باصص للحيطة فوقك..

بتفكر..ليه؟!

تقوم زي التايه تلف في الاوضة كام لفة..عينك تلمح المراية كأنك أول مرة تشوفها..

تبص لوشك في المراية..شكلك مقبول نسبيا..

يمكن دقنك..لو كنت حالقها ساعتها..

عنيك لونها مميز..يمكن افتكرتك عفريت..لالا إيه الهبل ده..

تبص تحت..يمكن الكرش؟

عادات الاكل بتعتك اتغيرت كتير..بس ده كان من بعد اللي حصل..

لأ مش ده السبب ..ترجع للحيرة تاني..

عادات الاكل بتعتك اتغيرت كتير..بس ده كان من بعد اللي حصل

-------------------------------

بحبها..

مشتاقلها..

محتاجها..

-------------------------------

تتكعبل في الكورة وإنت ماشي..

تبدأ تجرب كام حركة اتعلمتهم..تحس إن إنت ناسي كل حاجة..

تشوط الكرة بعيد..

تطلع بره الاوضة..مفيش صوت..سكون..

تروح اوضة المعيشة..فين البشر؟ كلهم اتفقوا يتخلوا عنك دلوقتي؟

ينط فدماغك كتاب 100 عام من العزلة..متعرفش إيه العلاقة..

فين البشر؟ كلهم اتفقوا يتخلوا عنك دلوقتي؟

-------------------------------

بحبها..

مشتاقلها..

محتاجها..

------------------------------

تبص عالكورنر تلاقي اللابتوب زي ماسبته آخر مرة..

تروح تفتحه..ساعة بيفتح )يخرب بيت أم الhp)..

تجري عالمسنجر والفاسبوك..تمارس العادة اللي اتعودت عليها من ساعة اللي حصل..

تبص على بروفايلها..

تدور تدور..مفيش حاجة..

راحت فين دي؟!

تكتشف إن مش عندك في صحابك

تدور تدور..تشوف المسنجر ..مش موجودة أصلا..

تدور تدور..مفيش حاجة..راحت فين دي؟!.

-------------------------------

بحبها..

مشتاقلها..

محتاجها..

------------------------------

الفار يبتدي يلعب في عبك..

تجري عالمسنجر..تشوف أي صاحب مشترك مابينكوا..

تتكلم مع واحد..إزيك؟..تمام..وإنت؟..تمام الحمدلله..

أُمّال فينها؟..مين هي؟..مين دي أصلا؟

تتصدم..بيقولك مين دي أصلا..

إيه ده..ده حلم ولا حقيقة..

كل الفترة دي كنت بتحب سراب..

كنت بتجري ورا سراب؟..بتحلم بسراب؟

تمشي زي التايه لغاية الاوضة..

تتمدد عالسرير..وتغمض عينك..يمكن تطلعلك في الحلم تاني..

كل الفترة دي كنت بتحب سراب..كنت بتجري ورا سراب؟..بتحلم بسراب؟

--------------------------

(تسمع صوت بناتي:

If I fell in love with you... Would you promise to be true?

)

If I fell in love with you... Would you promise to be true?

كتبت في: 6 -سبتمبر-2009

فوتوغرافيا: آيات فوزي

Tweet