بعد ما السيد المسئول ما أثبت إن اللي سرق لوحة الخشخاش ايطالي الجنسية..ايطاليا قررت إنها تعوض مصر عن تمن اللوحة قمح..أهو منه تسد مشكلة مصر مع القمح..ومنها إن كلها نباتات ربنا يعني..
على ذكر اللوحة..بيقولك الراجل اللي سرق اللوحة كان داخل المتحف ..من غير نية السرقة..وهو داخل لقي مفيش حد عالباب..قال قشطة يمكن عشان فاضي..دخل شوية لقى مفيش حد بتاع أمن جوه..قال ماشي يمكن أجازة..بيقرب إيده من اللوح المعروضة مفيش انذار..بيبص فوق لقى الكاميرات مش بتلف قال قشطة يمكن عطلانين..جت الكبيرة بقى..وهو بيلف قامت الكهربا قطعة..قال لك مابدهاش بقى..قام مطلع المطوة بتاعته(وده يثير الشك إنه من بولاق أو السيوف) وقام قاطع اللوحة وهوب طلع بره..وراح عالمطار..لقى في المطار بيفتشوا الطلاينة بس..قال يا ولاد اللعيبة..بس أنا مش طلياني..قام معدي من الجوازات وهوب على بلاد بره..
والموضوع ده يثير سؤال مهم..ياترى سرقة اللوحة مسئولية وزير الطاقة؟ ولا وزير الثقافة؟ ولا وزير الطيران؟ افتكرت ساعتها الفيديو بتاع المضيفة اللي قاعدة تحدف المخدات مع الركاب..وافتكرت يوم أما كنت راجع من روسيا والمضيفات اللي شفتهم في رحلة مصر للطيران..ربنا مايوريك..اتمنيت ساعتها إن تبقى مسئولية وزير الطيران عشان يشيلوا ***...بس أعتقد هيلبسوها لوزير الطاقة..ويونس فبلاد الشوق..آه يا ولد الهلالي..
على ذكر الوزرا..بعد تفكير وتحليل منطقي لازمة انقطاع الكهربا..عرفت مين المسئول..لاتقولي وزير الطاقة..ولا وزير البترول..المسئولية مسئولية وزير الاعلام..أيوه الاعلام..ميت ألف قناه بتذيع ميت ألف مسلسل وميت ألف برنامج..المهم إن ربنا رحمنا من برنامج البيض بيضك طلعلنا ضحكني شكرا(مفروض يبقى اسمه حاجة تانية نعتذر عن كتابتها نظرا لاني دخلت دلوقتي في الصيام شكرا) وبرنامج 100 مسا (مع استبدال الميم بحرف الفاء)..نرجع مرجوعنا..أيوه وزير الاعلام..الناس مش بتبطل تقوم من عالتلفزيون يا جدع..كهربة دي كل دي كهربة..وكمان زهرة والعار..الرجالة بتحتاج تولع المكيفات وهي بتتفرج..على رأي ميس حمدان..الدنيا هوت عالآخر أنا بقيت بشور واتر..
أهو الكلام عن الخشخاش والكهربة فكرني بـحاجة..بيقولك نسبة المصابين بالبواسير فمصر زادت..عشان الناس بقت خايفة تدخل الحمام..يعني الراجل يدخل الحمام من هنا..النور يقطع من هنا..يقطع الخلف من هنا وقتي..فيقال لك مابدهااش..خليني في اوضتي اكرملي..
تقولي كلمني عن التخلف..اقولك ماشي..التخلف إن إنت تبقى في بلد زي السعودية..الستات فيها بيتشحوا بالسواد من ساسهم لراسهم..وتلاقي إن الدنيا كلها محلات هدوم حريمي..ويطلع **** عشان تلاقي محل محترم بيبيع حاجات رجالي..
وعلى ذكر التخلف..يحضرني موقف هنا..في مصر أم الدنيا..الموقف باختصار..ناس واقفين في الممنوع وبياكلوا من مطعم..الظابط جه..كلبش العربية..قاموا جاروا عليه ..دفعوا ال25 جنيه..رجعوا ياكلوا تاني والظابط واقف وسابوا العربيات في الممنوع والظابط متكلمش..المهم إنه لم! وده ان دل على شيء يدل على إن الشرطة والشعب فخدمة جيب الحكومة..آه أُمّال إيه..هيعملولنا بنية تحتية وكهربة ومية منين؟ ده احنا مفخرة دول العالم في البنية التحتية..
السؤال هنا..ميزانية المتحف,ال37 مليون جنيه..راحوا فيييييييين؟ابسطهالك..أنا لو ادوني 37 ألف جنيه أنا ممكن اظبتلهم المتحف في السنة كلها..ابسطهالك..يعني لو إنت بتاخد مصروف من باباك في الشهر 370 جنيه..هو قده 100000 مرة..ابسطهالك..37 مليون..وكاميرات بايظة..وأجهزة انذار بايظة..ماهو ياأما حاجة من تلاتة..يااما مرتب عامل النظافة وبتاع الأمن والمديرة..150000 في الشهر..يااما الحكومة مهتمية قوي بالسياح وعملالهم ياناصيب زي بره والجايزة بتاعته بالمليون و 2 مليون..الحاجة التالتة بقى معروفة..ومش محتاجة جودت الملط يقولهالك..
عجبني قوي تصريح السيد المسئول..بيقولك إيه يا سيدي..انقطاع الكهربا والمية والبلاوي اللي بتحصل فمصر..بتزيد من ثواب الصايم..طب منيييييييين عايزين تفصلوا الدين عن الدولة..ومنيييييين السيد المسئول بيتكلم في الدين وبيخلطه بالدولة؟ ومن امتى السيد المسئول بقى شيخ الازهر؟ طب بالنسبة مثلا للاخوة في الدول العربية الشقيقة وغيرها اللي عايزين يستفيدوا من رمضان والصيام اقصى استفادة..وياخدوا اعلى اجر وثواب..ممكن يقضوه فمصر؟ ومن موقعي هذا وكمواطن مصري أصيل بيحب بلده..بدعوا وزير السياحة إنه يعمل حملة جديدة..حملة الصيام فمصر..مش زي أي صيام..ويبقى الهدف بتعهـا اعادة مصر كمركز اشعاعي في العالم الإسلامي..وأهو نفيد ونستفيد برضه..
your writings really are unbelievable they touched me. I read them everyday i like the pureness and simplicity in them and the frankly words .. and I really feel that you are a rare compounded person :) .. keep it up :)
ReplyDeleteThank you..Thank you..Thank you
ReplyDelete