عمري ماعرفت أعمل بالونة بالماستيكة..كنت دايما بشوف اخواتي الصغيرين بيدخلوا الماستيكة فبقهم..وبطريقة سحرية عجائبية متحولة..وبقدرة قادر..تتحول لبالونه!يا للهول! كنت باذبهل اذبهلال ولا اذبهلال التوانسة لما ابوتريكة جاب الجون فماتش الصفاقسي..وكان نفسي اعرف..بيتعلموا الحاجات دي فين؟وامتى؟وإزاي؟يعني هل مثلا جالهم مدرس قالهم يا ولااد..النهارده حصة بالونات..هنتعلم إزايتقضي وقت فراغك فإنك تعمل بالونات من المستيكة..يلا كله يفتح بقه..ثني اللسان مع ادخال المستيكة أسفله..النفخ بالهواء حتى تصير لديك بالونة كاملة الاستدارة وجميلة..احذر من النفخ الزائد فقد يؤدي إلى انفجارها في وجهك..طب ذنب ميين إني مبعرفش..أعمل بالونه يا واطي منك له..ذنب أهلي ؟ ولا ذنب المدرسة؟ ولا ذنب اخواتي؟ توصلت في الآخر إن الذنب ذنبي عشان مهتمتش باني اقضي وقت فراغي بالطريقة الصح!
حاجات كتير تانية مفروض اعرف اعملها بس مش بعرف اعملها..مثلا..مش بعرف أسوق..آه واللهِ..عمري مامسكت دركسيون ودست عالداواسات..ايون أنا عندي 20 وداخل على 21 ..بس عمري ماكان ليَّ اهتمام بالسواقه والعربيات والكلام الفارغ ده..مع إن حلم كل شاب إنه يوصل للسن القانونية وإنه يجيب واسطة كويسة عشان يطلع رخصة..دايما كنت بشوفهم حمقاء..ليه الإنسان يتعلم حاجة هتجيبله خناقات ومشاكل وغرامات ووجع قلب..سياستي في الموضوع ده إني بنقل المسئولية لحد تاني..بيكون ياإما سواق المشروع أو سواق التاكسي..أنا راكب ولا همي..بدفع الأجرة بتعتي..هو بقى اللي يسوق واللي يتخانق..او يعمل حادثة هو المسئول...
حاجة تانية مش بعرف اعملها..أو مش عارف إذا كنت بعرف اعملها ولا مش بعرف اعملها..السباحة..أيوه أنا اسكندراني وأيوه عندي 20 سنة وداخل على 21..بس مش بعرف اعوم..تخيلوا! أيوه كنت بعرف اعوم..زمان لما كنت في المدرسة في السعودية كان فيه لوحة كبيرة قوي..علموا أولادكم السباحة والرماية وركوب الخيل..فـهما الصراحة كانوا بيعملوا اللي يقدروا عليه..بيعلمونا سباحة..بعديها جت فترة بتاع 10 سنين منزلتش مية..أيوه بجد 10 سنين..أنا كائن بري..وبعدين من كام سنة ابتديت أروح مع صحابي الساحل..فـببقى خايف اجرب..والمية غدارة والعمر قصير..فـكنت بأنزل على استحياء..
آخر حاجة مبعرفش اعملها..أو يمكن آخر حاجة أنا عارف إني مبعرفش اعملها..هي شرب السجاير..أنا عمري مجربت أحط سيجارة فبقي..أيوه أنا عندي 20 وداخل على 21..وعمري مجربت أحط سجارة فبقي..لدرجة إني فوقت من الاوقات كنت بفكر:" افرض بقيت ممثل مشهور ..وكنت طالع بقى فدور الكبير..ولا فدور البيه الظابط..وكان في المشهد المرعب بتاع الشر ده..اللي بشرب فيه السيجارة..هتصرف إزاي ساعتها..وياترى ممكن يمشوني من الفيلم عشان مش بعرف أشرب سجاير؟"
حاجة كده صغيرة..مش عارف تتحسب ولا لأ..عمري معرفة اثير اعجاب بنت أنا معجب بيها!
ماندووووووووووووووو
ReplyDeleteانت كده عديت بجد
انا بعرف اعمل بالونه بالمستيكه, دى حاجه بنتعلمها بالفطره كده كتك نيله
بس انا معاك فى كل الباقى
وحد تانى كده برضه
رناا..مبسوط إنها عجبتك :)
ReplyDeleteطب المرة الجاية تعلميني بتعمل إزاي بقى
وإيه الحاجة التانية كمان؟
موضوع بالونة المستيكة دي أنا بعملها للتنفيس عن نفسي مش في أوقات الفراغ، يعني أنا لما بكون متنرفزة، بقعد أنفخ في بلالين لحد ما أهدى وأحيانا الحاجة دي بتساعدني على التفكير وأنا بكود .... أنا فاكرة زمان كانوا كل أطفال الجيران والحضانة بيتلموا حواليا وأنا بعملها، أصل بتعتي كانت كبيرة أوي وملفتة جدا وكنت باكل نوع خاص من المستيكة وما كنتش بقول لحد عنه ....ء
ReplyDeleteأنا مش فاهمة إيه المحرج أو اللي بيزعل في إنك عمرك ما شربت سيجارة ؟؟؟ دي حاجة لازم تكون فخور بيها أوي ومبسوط وتشكر ربنا إنه بعدك عن السكة دي و باباك ومامتك إنهم طلعوك كدة ...ء
وأنا أنصحك إنك تتعلم السباحة والرماية وركوب الخيل فعلا، وكمان تشجع صحابك على كدة واعتبره تحدي مع نفسك أو إثبات لنفسك إن الموضوع سهل عشان أنا قرأت من فترة (مش فاكرة فين صراحة) ، بس أتوقع كان حديث، إن قرب يوم القيامة كل التكنولوجيا والآلات الحديثة (مسدسات، دبابات، مدافع، طيارات) هتترفع والحاجات دي كلها هتتنسي وتتمحى من عقل الناس والمسلمين هيحاربوا اليهود بالسيوف والرمح زي أيام الرسول صلى الله عليه وسلم
وأكيد ربنا كان معرف الحاجة دي للرسول عشان كدة هو نبهنا
هي بتنفع في الكودينج فعلا؟ كده هبدأ أفكار جديا فاني اتعلمها..
ReplyDeleteأنا مش محرج..أنا فخور الحمدلله
أيوه ما أنا باخد خطوات جادة إن شاء الله عشان اتعلم
شكرا لقراية المقال وشكرا للتعليق :)