عثمانيات

-التحضر الزائف: إنك تاخد بعض أفراد العيلة من الجيل الكبير لفرح في فندق فلسطين
ليه بقى ..اقولك ليه:
1-نميمة نميمة نميمة نميمة نميمة على كل البشر..نميمة على المسئول عن القاعة كمان..مبيسبوش حد فحاله.."مش دي البت اللي سابت جوزها من 5 سنين..هي متجوزتش تاني ليه".."مش عارفة أكيد العيال شغلوها بقى وهي أصلا مش حلوة ".."آه على رأيك"
2-أكتر حاجة ضحكتني واحنا رايحين الفرح ..كنا معديين عالبحر..فـواحدة من قرايبنا الكبار دول بتقول..نادي التجاريين دول حرامية..بينصبوا عالناس..الحاجات عندهم غالية قوي..ده الشاي بـ3 جنيه..اعتقد لو ودينهم سيلانترو ولا حاجة هيجلهم سكتة قلبية وقتي
3-بطريقة ما..واحدة من الجيل الكبير برضه عرفت تكلفة الفرد الواحد في الفرح كام..فـطول القعدة بقى..دول اضحك عليهم..دول اضربوا على قفاهم..ولما نزل الحلو..كان فيه ايس كريم..سمعت تعليق كده..إيه ده جيلاتي عزة أحسن منه..

-امبارح كان عندي انترفيو في الكلية..فـحقيقة إن واحد صاحبي اللي كان هيعملي الانترفيو خلاني مهتميش قوي فـرحت بشورت..داخل عالبوابة لقيت الراجل بيقولي ممنوع..بقوله ممنوع إيه, بيقولي ممنوع الدخول بالشورت..ليه؟ مفيش سبب..جيت أدخل من الباب التاني قال لي ممنوع يا أستاذ..روح ادخل من الباب اللي فيه الظابط..اللي هو أنا لسة جاي منه..المهم مدخلتش في الآخر..وأنا واقف بره لقيت واحد لابس شورت بس أطول شوية قام مدخله..طب إيه المقياس؟ على رأي واحد صاحبي لو اللي قاعد عالباب الشورت ماأثارهوش بيعدي اللي لابسه..لو اثاره(أيوه قصدي المعنى ده)..ميعدهوش..
السؤال هنا..ليه؟طيب أنا كنت باحكي الموضوع ده لواحد صاحبي في المجمع..قال لي عندهم ممنوع برضه..بس البنات بالشورت أو ميني جيب بيدخلهم..طب اشمعنا؟ مفيش سبب واضح..

-في سؤال بيطرح جانب اخلاقي جامد ..شغل بالي الفترة اللي فاتت دي..الا وهو..هل من الأخلاقي استغلال حدث مؤسف ومدمر لشخص معين أو عدة أشخاص في مقابل الترويج لهدف نبيل؟
أنا بتكلم عن واقعتين محددتين..الاولى واقعة أسطول الحرية..واللي مات فيها ناس كتير..وتم استغلالها للترويج لصورة إسرائيل البشعة..بس على حساب ألام وجثث ناس كتير ماتت..التانية هي واقعة خالد سعيد..وإزاي تم استغلال اسمه في اظهار بشاعة النظام ..
على فكرة أنا مش ضد الحملة دي..أنا بس بطرح تساءل جه فدماغي..ومش لاقيله إجابة

Tweet