كفاحي...أيوه كفاحي...كفاحي أنا مش هتلر...كفاحي في 20 سنة...كفاحي الأزلي...كفاحي اللي هيفضل كام سنة قدام...كفاحي اللي هيفضل لحد أما اتجوز أو أموت ايهما اقرب..كفاحي مع البنات...
كفاحي مع البنات بدأ فعليا من 3 ثانوي...أيام الدروس بقى..والحب الصامت..والحب من طرف واحد...والتسبيل بقى ..كانت أيام سودة...المهم إني ساعتها أعجبت ببنت...كانت إيه بقى...الشعر الأصفر...العيون الزرقا...القوام الممشوق(زي مابيقولوا)..وطبعا واضح من الوصف إنه كان من طرف واحد..وطبعا واضح إن الطرف ده كان أنا...بس كنت مثابر بجد عليها..لدرجة إني نزلت مراجعة ليلة الإمتحان في درس الفيزيا عشان أشوفها...وهي مجتش...وطول السنة متكلمناش...وجه الصيف...وجت السنة اللي بعدها...وف أول زيارة ليَّ لكلية صحابي لقيتها في وشي...الشكل هو هو..النضارة نفسها..الفرق إنها خست شوية...بقت تدي على أي واحدة شعرها أصفر وبتلبس نضارة على ذوقك..بس تكون حلوة يعني...وبرضه استمر المسلسل...كنت بايت عندهم في الكلية...لا كلام ولا أي حاجة...بأعود كتير قوي أتأمل فيها...وناس قلتلي إنها حست..بس طبعا أنا مختش خطوة...نقص خبرة بقى...وعدت السنة...وجت السنة اللي بعدها..وبدأتها بـقصة حب جديدة...المرة دي معايا في الكلية لسهولة التواصل..كلمة من هنا كلمة من هنا حبينا بعض...بس طبعا مفيش حب من غير مشاكل والشيطان شاطر وشياطين الإنس اشطر...وقعونا في بعض...وسابتني بفضيحة يعني...فضيحة ليّا أكيد...وسبنا بعض..أو سابتني...بعد كده بقى علاقة تالتة مبحبش أتكلم فيها...عشان أكتر واحدة ندمت عليها...مش الشخص ..العلاقة...
أنا باحكي ليه كفاحي مع البنات...مش عارف..يمكن عشان دلوقتي بقرا كتاب اسمه الحتة بتاعتي..بيتكلم عن العلاقة بين الراجل والست بصورة ساخرة...أو يمكن عشان الكلام الكتير عن حقوق الستات..أو يمكن عشان جه في دماغي تصنيف كده للبنات اللي قابلتهم...وده رأي شخصي بحت..والتصنيف حسب الشكل...
1-البنت المحجبة أو المش محجبة اللي مش جميلة:ودي المحجبة منها بتبقى عندنا في الكلية...والمش محجبة بتبقى في الكليات الأدبي...بتبقى فاكرة نفسها ملكة جمال الكون..أي ولد ييجي يكلمها ياإما جاي يعكس ياإما جاي يظبط...عندها سلوك عدواني...تعشق قعدت البنات...تتباهى بان مفيش ولد عرف يعلقها مع إن نفسها تتعلق...لديها ميول انتحارية..
2-البنت المحجبة الجميلة:ودي اللي أنا نفسي إني ارتبط بيها...بتبقى بنت هادية..واثقة من نفسها...عارفة حدودها مع الولد إيه...في منها بيصاحب وفي لأ...بتبقى مصاحبة بنات كتير من النوع التالت...مبتخفش تبين مشاعرها بس بحدود...إذا كنت تبحث عن زوجة فا ننصحك بالنوع ده...
3-البنت المش محجبة وجميلة: دي بقى بتبقى التوب...بتبقى العين عليها دايما...الناس كلها بتبقى عارفة اسمها وهي تبقى عارفة اسم ناس قليلة...تحس إنها ملكة في زمان الرؤساء...بتبقى واثقة في نفسها ثقة عميق..بتكسر قلوب كتير بقصد أو بدون قصد...حلم أي شاب فيمرحلة المراهقة...غالبا بتبقى مجنونة...يعني مش هادية..
طبعا لكل قاعدة شواذ...فـا لكل نقطة حُط اسثثناءات..يعني مش كل البنات المحجبات كده...وهكذا..
في نقطة كمان عايز اتكلم فيها...ورأيي فيها مش هيعجب ناس كتير...مين اللي يقول للتاني إنه بيحبه أو معجب بيه...الولد ولا البنت...أنا رايي واضح ومحدد...مش فارقة..البنت لما تقول للولد ده مش بيقلل منها خالص...اشمعنا في دي بذات مطلبتوش المساواة...البنت تقول..الولد يقول...المهم حد يتنيل يقول…
أنا عارف إنه بوست ملهوش أي لازمة...مش عارف ليه كتبته أصلا..بس على رأي محمد صلاح..أهو كلام والسلام...
.
No comments:
Post a Comment